Г.Цыбиковэй нэрэмжэтэ Агын үндэhэтэнэй музей соо эмхидхэгдэдэг «Магтанабди алдарта уг гарбалаа» гэhэн үзэсхэлэн заншалта болонхой.
Галзууд, хуасай, хүбдүүд, харгана, шарайд, бодонгууд, хальбан, сагаангууд - эдэ Ага найман эсэгын омогуудта зорюулагдаhан үзэсхэлэнгүүд олон жэлэй туршада дэлгээгдэжэ, олоной hонирхол татаhан байна. Уг гарбал, угай бэшэг гээшэ юун бэ, юунэй түлөө угаа мэдэхэ хэрэгтэйб гэжэ ойлгуулха зорилготойгоор эдэ хэмжээ ябуулганууд эмхидхэгдэнэ. Уулзалгануудай үедэ мэдээжэ, алдар солотой, аша габьяатай, уг гарбалайнгаа hүр hүлдэ, мүн нютагайнгаа нэрэ дээрэ үргэжэ ябаhан эрдэмтэдэй, лама санаартанай, хүдөө ажахын мэргэжэлтэдэй, урагшаа hанаатай, эрмэлзэл ехэтэй залуушуулай, талаан бэлигтэй нютагайхидай - хүн бүхэнэй досоо омогорхол заатагүй түрэдэг.
Харин март hарын хуушаар гушад, худай ба батанай - эдэ гурбан омогойхидто зорюулагдаhан үзэсхэлэн дэлгээгдэхээр, уулзалганууд үнгэргэгдэхөөр хараалагдана. Эдэ гурбан омогой түлөөлэгшэдэй бэеэ танюулжа, Агын үндэhэтэнэй музейдэ мэдээгээ үгөө һаань, болохо байна.
