Мартын 19-дэ Агын соёлой байшан соо «Гурбан тенорнүүдэй» – Чайковскиин нэрэмжэтэ Москвагай гүрэнэй консерватори түгэсхэгшэд Саян Цымпиловэй, Соёл Батуевай болон «Байгал» гэһэн дуу ба хатарай гүрэнэй театрай солист Мунко Батомункуевай концерт болоо.
Дуушадай концерт аккомпаниаторгүйгөөр дутуу байха ха юм. Гурбан тенорнүүдэй дуу мэдээжэ композитор Сергей Манжигеевэй хүбүүн – концертмейстер Саян Манжигеев үдэшөө. Агын шоумен Андрей Болотов хүтэлэн ябуулхадаа, харагшадые артистнартай харилсуулан, һонирхоһон асуудалнуудтань харюу абхуулһан байна.
Тиигэжэ харагшад Саян Цымпилов - дуушадай олон тоото уласхоорондын конкурснуудай лауреат, мүнөө Галина Вишневскаягай нэрэмжэтэ Оперно дуунай түбтэ дүршэл гаража байна, оронойнгоо олон оперно театрнуудай тайзан дээрэһээ дуулаһан гэжэ мэдэхэ болобо.
Мунко Батомункуев һаяын сагта ямар концерт-нааданда хабаадахабиб гэжэ тайлбарилаа, дуу гүйсэдхэхэ дүршэлөө яажа мүлидэгөө, һургуулияа саашань үргэлжэлүүлхэ хүсэлтэйгөө мэдүүлээ.
Гурбадахи тенорынь Яруунаһаа уг гарбалтай артист, Мариинска театрай Залуу дуушадай академиин ассистент-стажёр Соёл Батуев болоно. Тэрэ XX «BELLA VOCE» болон Москвагай уласхоорондын дуушадай конкурснуудта илаһан габьяатай.
Иигэжэ харагшад нютагаймнай залуу артистнар хэр ургалтатайб, хаана юу хэнэб гэжэ мэдээсэл абахаһаа гадна тэдэнэй гүйсэдхэһэн ород, итальян болон буряад композиторнуудай дуунуудые шагнажа хужарлаба.
