Эсэгэ ороноо хамгаалгын Агууехэ дайнай дүүрэһээр 75 жэлэй ойн баярта дашарамдуулан, 4 Геройн нэрэнүүд мүнхэрүүлэгдэбэ. Улаан-Үдын 63-дахи һургуулиин дэргэдэ Буряадай АССР-эй арадай уран зурааша Георгий Москалёвой, 108-дахи гимназиин урдахана Базар Ринчиногой, 52-дохи һургуулиин захада Осип Денисовэй, харин 31-дэхи һургуулиин хорёо соо Пётр Харитоновой хүрэл дүрсэнүүд тодхогдобо. Эдэ бүхы уран барималнууд гартаа дүйтэй уран бүтээлшэ Болот Цыжиповэй ударидалга доро «Лотос» гэдэг эмхидэ бүтээгдэжэ, «нара» хараһан байха юм…
…«Лотос» гэһэн дарханай гэрэй бүтээлнүүд олохон нютагуудта арад зоной нюдэ хужарлуулдаг. Болот Цыжиповэй түрэл тоонто Агадань Баатарнуудай хүшөө, Хурамхаанай Ажалай Баатарнуудта зорюулһан 12 хүнэй сээжэ барималнууд нютагай түб талмай шэмэглэнэ. Улаан-Үдэдэ «Дайнда унаһан үетэндөө» (Чёрный тюльпан «Ровесникам, ушедшим в бой») гэһэн талмайн дэргэдэ Ород Уласай Герой Алдар Цыденжаповта зорюулһан хүшөө, һаяхана суута маршал Рокоссовскиин мориндо мордоод байһан дүрэ байгуулаа. Дархашуулай бүтээһэн уран барималнуудые тоолохо болоо һаа, амаргүй олон даа.
- Хэхэ ажалнай ехэ. Уран барималай тааха нюусанууд үшөө аргагүй олон. Хүгжэхэ, ургаха хэрэгтэй, - гээд Болот Цыжипов хэлэнэ.
Үнэхөөрөөшье, Болот ахатан мүнөө үедэ дүрөө дээрэ ябана гэхэдэ, алдуу болохогүй. Улаан-Үдэ хотын Захиргаанай захилаар бүтээгдэһэн дүрбэн Геройн сээжэ барималнууд Илалтын һайндэрэй урдахана бэлэн болоод, хүндэтэ һуурияа эзэлжэ тодхогдоо. Эдэл Баатарнуудай дайшалхы габьяа, мохошогүй зориг ургажа ябаа улаан бургааһадаа хүмүүжүүлхэ хэрэгтэмнай тон һайн нүлөө үзүүлхэ бэзэ.
