Гүнэй нютагай ажаһуугшад hууринаа сэбэрлэлгын хүдэлмэринүүдтэ бүгэдөөрэн эдэбхитэй хабаададаг юм. Нютагай захиргаан ажаһуугшадаа урмашуулжа, хотоной, эмхи зургаануудай, ТОС-уудай хоорондо мүрысөөнүүдые эмхидхэдэг заншалтай. Жэл бүри энэ нютагта хабарай ба намарай хаһада санитарна сэбэрлэлгээр ехэ хэмжээнэй ажал хэгдэдэг гээшэ. Мүнөө намар ажалша коллективүүд стадионойнгоо, котельниин, дурасхаалай хүшөөгэй хорёонуудые сагаадаа. Эсэгын дайнай ара талын хүдэлмэридэ ябаһан Радна Дугаржапов, Бутид Очирова, Рабига Рамазанова гэгшэдэй гэрэйнь хушалтанууд заһабарилагдаа, веранда баригдаа. Тиихэдэ Мария Осипова, Хандажаб Намжилова, Норжимо Базарова, Пагма Санжаева гэгшэдэй гэртэ пластикова сонхонууд табигдаа. Гүнэйн 11 үрхэтэ айл хорёогоо шэнэлээ, шэрдээ бшуу.
"Центральная" гудамжа.
“Звезда” ТОС-ойхид “Радуга” гэжэ нэрэтэй багашуулай наадаха талмайхан бариһан байна. Учительская гудамжаар волейбол, футбол наадаха талмайнуудые бэлдээ. Харин “Дүлэн” ТОС-ойхидой Северная үйлсэдэ “Солнышко” гэжэ нэрэтэй багашуулда талмай түхеэржэ, тэрээн дотор үндэр газарһаа һолжоржо наадаха гэрхэн бариһаниинь, эдиршүүлэй һонирхол бүри татана. Тус ТОС-ой гэшүүд хартаабхын поли хорёолжо, мүнөө намар 2 тонно ургаса хуряагаа. “Олимп” ТОС-ой гэшүүд хотонойнгоо багашуулда талмай зохёохо түсэбтэй. “Родник” ТОС-ой гэшүүд хотондоо 12 баннер шэнэлээ, худаг малтаа. Хотоной Луговая, Центральная, Школьная, Северная, Коханского гудамжануудаар 48 фонарь тодхогдожо, һүниндөө үйлсэнүүдые гэрэлтүүлнэ. Нютагай захиргаанай согсолһон дүнгүүдээр, “Дүлэн” ТОС (түрүүлэгшэнь - Артур Цыбенов), «Улаалзай» сэсэрлиг, Владимир Будаевай хүдөө бууса, Дашинима Эрдынеевэй гэр байра, Учительская гудамжаар оршодог худаг эрхимүүд гэжэ нэрлүүлэгдээ.
Урда-Ага нютагай захиргаанай мэдэлэй “Баян-Булак” һууринда зоной ажабайдал булаг мэтэ бурьялжал байдаг. Һаяын жэлнүүдтэ баригдажа, ашаглалгада тушаагдаһан соёлой байшан соо һууринай зон сугларжа, соёлой, тамирай хэмжээ ябуулгануудые эмхитэйгээр үнгэргэдэг. Бильярдаар, столой теннисээр мүрысөөнүүд эмхидхэгдэжэ, олоной дура татадаг юм. Баян-Булагта “Онон” ТОС бии. Түрүүлэгшэнь – Биликто Базаров. Биликто Дашинимаевич зоноо хамтын ажалда хабаадуулжа, багашуулдаа нааданай хотохон барюулһан, олоной туһаар субарга бодхоогоо, һуурин соогоо 71 модо һуулгаа.
Хүршэ Һүдэнтэдэ “Эрдэм”, «Тоонто» ТОС-ууд бии. Нютагай захиргаанай толгойлогшо Батор Балдановай хэлэһээр, һургуули дүүргэһээр, ойн баяраа тэмдэглэжэ байһан онойхид нютагтаа барилгын, сэбэрлэлгын ажал жэл бүхэндэ хэжэ, ехэ хубитаяа оруулдаг. Жэшээлбэл, 1979 ондо түрэһэн хүбүүд багашуулай наадаха талмай баряа һэн. Бэшэ онуудта түрэһэн һургуули дүүргэгшэд стадион һэргээгээ. Обоо тахидаг, мунханай г.м. шүтөөнэй газарнуудаар сэбэрлэлгын ажал ябуулагдаа. «Эрдэм» ТОС-ой гэшүүд нютагайнгаа эрдэмтэдээ аллей бүтээжэ бариһан байна. Түрүүлэгшэнь Дондок Дараев юм. «Тоонто» ТОС (түрүүлэгшэнь – Цыден Дондоков) хотондоо хүүгэдэй наадаха талмай бариһан байгаа.
Дэлгэрэнгыгээр 48-дахи дугаарта.
