Хүйтэнэй сагта котельнинүүдэй соргоһоо хара утаан бушхажа, гэр байранууд дулаагаар таһалгаряагүй хангагдана. Декабрь hарада улам хүйтэрхэдэнь, дулаагаар хангалгада анхарал бүри дээшээ болодог.
ДУЛДАРГЫН АЙМАГТА
Дулдаргын аймагай захиргаанай гэр байрын ба коммунальна ажахын таhагые даагша Насак Шагдаровтай уулзажа, дулаасуулгын хаһын ябасаар хөөрэлдөө үнгэргөөбди.
- Насак Дашидондокович, аймагтатнай дулаасуулгын хаһа ямар ябанаб?
- Мүнөө үбэл Дулдаргын аймагта 27 котельни хүдэлнэ. “Универсал плюс”, “Саханай” гэһэн дулаагаар хангадаг 2 нээмэл бүлгэмтэйбди. “Универсал плюс” гэһэн бүлгэм 15 котельни хангана. Котелнинүүдынь һургуулиин, хүүгэдэй сэсэрлигүүдэй байшангуудые дулаагаар хангадаг гээшэ. “Саханай” бүлгэм Дулдарга һуурин соо 5, тиихэдэ федеральна албангуудай мэдэлэй 7 котельни ажалладаг байна. “Универсал плюс” бүлгэм Түгнын шулуун нүүрһэнэй уурхайһаа түлишэ абана. Хэлсээниинь декабрь һарада дүүрэхэ болзортой. Харин “Саханай” бүлгэм 44-дэхи федеральна хуулиин ёhоор тендернэ наймаагаар нүүрһэтэй болоно. “Ставров” гэһэн эмхи нүүрһээр хангана. Тиихэдэ аймагуудай котельнинүүдтэ Уртын шанар һайтай нүүрһэн ерэнэ. Гарахаяа байһан 2017 ондо Үрейн шулуун нүүрһэнэй уурхай хүдэлжэ эхилхэ һурагтай. Үнгэрэгшэ үбэл тэндэһээ нүүрһэ абадаг байгаабди. Үрейн нүүрһэ магтаха байнаб. Һайн шанартай, үнэгүйшье, манда дүтэшье гээшэ. Нёдондо үбэлһөө хадагалһан нүүрһэмнай һаял дууһаа.
____________________________________________________________________________________________________
АГА ТОСХОНДО
Ага тосхондо элдэб хүсэтэй арба гаран котельни эмхи зургаануудые дулаасуулгын ээлжээтэ хаhадаа ороод байнхай.
Тосхоной захиргаанай толгойлогшын 1-дэхи орлогшо, гэр байрын ба коммунальна ажахын таһагай дарга Бато Добчинов тосхоной котельнинүүдээр ябажа, дулаагаар хангалгые хинажа, хаража байдаг. Бато Бороевичой мэдүүлһээр, Агада “Теплосервис”, “Теплоэнергия”, “Теплосервис” гэһэн дулаагаар хангадаг гурбан эмхи бии юм. Тосхоной Г.Цыбиковэй гудамжаар оршодог «Теплосервис» эмхиин мэдэлэй котельни оньhожоруулагдамал аргаар хүдэлдэг юм. Котельниин бригадир Түмэн-Баир Балдановай хэлэһээр, «Байшан (склад) сооhоо нүүрhэн конвейер дээрэ асарагдажа, бункер руу оруулагдадаг. Пеэшэн соо шатажа дүүрэхэдэнь, бункер соохи нүүрhэн зайн галаар хүдэлдэг хэрэгсэлэй ашаар пеэшэн руу хаягдадаг байна. Эндэ бүгэдые кочегар шалгажа байдаг уялгатай. Электро-тоолуур дээрэ (счётчик) нүүрhэнэй шатажа дүүрэхэ, нүүрhэ хаяха сагуудай ябаса элеэр харагдажа байдаг. Сагай уларил баримталан, кочегарнууд 40-45 градус халуун байлгахые оролдоно.
МОГОЙТЫН АЙМАГТА
“Могойтын аймагай хүдөө нютагуудаар, тосхон дээрэ дулаасуулгын хаһа бараг хэмжээндэ ябана”, - гэжэ аймагай захиргаанай ЖКХ-гай ба барилгын таһагай даргын орлогшо Даши Доржижапов ажал хэрэгүүд тушаа хөөрэнэ.
Декабриин эхеэр «Агаугажаллана. Даши Дамдиновичай мэдүүлһээр, Могойтын аймагай муниципальна байгуулалтануудта оршодог 51 котельни, дулаагаар хангадаг 15 муниципальна эмхи ба нээмэл бүлгэм ажалладаг байна. «Урта» хүдөө hууриниие «Титан» гэhэн нээмэл бүлгэм шулуун нүүрhээр хангадаг шуу.
Дэлгэрэнгыгээр 49-дэхи дугаарта.
