Энергетигэй үдэр угтуулан, Агын РЭС-эй даргын уялга дүүргэгшэ Цырен-Доржи Дугаровтай уулзажа, мүнөөдэрэй ажаябуулганууд тухайнь хөөрэлдэһэн байнабди.

- Цырен-Доржи Николаевич, түрүүн өөр тухайгаа богонихоноор хөөрэжэ үгыт.

- Би 1984 ондо Агын аймагай Новоорловск тосхондо түрэһэнби. Амидхаашын дунда һургуули дүүргээд, Улаан-Үдэдэ оршодог Зүүн Сибириин гүрэнэй технологиин дээдэ һургуулида орооб. Тэндэ үйлэдбэриин эмхинүүдые зайн галаар хангалгын мэргэжэлдэ һурааб. Тэрэнээ амжалтатайгаар түгэсхөөд, Агаяа бусажа, энэ эмхидэ ажаллажа эхилээ һэм.

- Аба эжытнай энергетигүүд байһан гү: юундэ энэ мэргэжэл шэлээбта?

- Энэ ажал ямаршье сагта эрилтэтэй байха гэжэ бодоод, энергетик болохоёо шиидээб. Аба эжымни энэ мэргэжэлдэ хабаагүй.

- Хэды жэл хүдэлжэ байнабта?

- Юһэн жэл хүдэлжэ байнаб. Түрүүн электромонтёроор хүдэлөөб, һүүлээрнь даргын орлогшоор ба мүнѳѳ уялга дүүргэгшээр томилогдоод байнаб.

- Олон ажалтад хүдэлдэг гү?

- Манай эмхидэ 58 хүн хүдэлнэ.

- Энергетигээр хүдэлхэдэ ямар бэ?

- Һонин ажал, тиигээшье һаа хүндэ бшуу. Олон бэрхэшээлнүүд тохёолдодог. Зайн гал эдлэгшэдтэй хүдэлдэгбди, түхеэрэлтэнүүд хуушарһан. Мүнөө мүнгэн багаар һомологдодог болоһон, тиигэбэшье заһабарилгын ажал ябуулагдана. Аалиханаар шэнэлэлгэ хэнэбди.

- Хүдөө нютагуудаар ябадаг гүт? Байд гээд лэ дуудуулдаг гүт?

- Түсэбөөрөө түхеэрэлтэнүүдые ябажа харадагбди. Түсэблэгдөөгүй дуудалгануудта - авариин болоходо, зайн галай ябахаяа болиходо, үгы һаа, зайн гал эдлэгшэдэй мэдүүлгэ бэшэхэдэ ошодогбди.

- Һүүлэй жэлнүүдтэ ямар хубилалтануудые тэмдэглэхээр бэ?

- Зайн гал эдлэгшэд хуулиин талаар һайн мэдэсэтэй болоо. Тиигэбэшье арсалдаанууд болодог. Минии ажалда ороходо, зайн галай утаһа таһалуулха ушарнууд олон болодог һэн. Түргэн хүдэлдэг болообди - юумэнэй эбдэрхэдэ, заһабарилгада бага саг ошодог болонхой.

- Мүнөө жэл ямар нютагуудта ажал хэгдээб?

- Энэ жэлдэ Шулуутай, Үбэр-Аргали нютагуудта заһабарилганууд үнгэргэгдөө. Тиихэдэ Орловск тосхондо багахан заһабарилганууд хэгдээ. Ехэнхидээ зайн гал дамжуулгын утаһануудай тулганууд һэлгэгдэнэ.

- Саашанхи түсэбүүдтэеэ хубаалдыт.

- 2017 ондо Шулуутайда, Согто-Хангилда багахан ажал хэгдэхэ.

- Хүнүүд танай мэргэжэлтэдтэ ехэнхидээ ямар асуудалнуудаар хандадаг бэ?

 

- Үдэр бүри шахуу шэнэ гэр, объектнүүдтэ зайн гал оруулдагбди. Ехэнхидээ - Ага тосхондо, Амидхаашада. Тиихэдэ зайн галай шанарай асуудалнуудаар хандадаг, тэдэнииень түргөөр шиидхэхые оролдодогбди. Электрическэ счётчигой талааршье хүнүүд хандадаг. Жэшээнь, зайн гал эдлэһэнэй мүнгэ ямар нэгэн айл ехээр түлэһэн, үгы һаа багаар түлэһэн ушарнууд дайралдадаг. 2013 ондо Ага тосхондо автоматизированнэ тоололгын системэ нэбтэрүүлэгдээ. Тиигээшье һаа энэ ажал гүйсэд дүүргэгдээдүй байна.

 

Дэлгэрэнгыгээр 51-дэхи дугаарта.

You have no rights to post comments