Сагаан-Шулуутай нютагта 154 һууритай соёлой байшан баригшад улаан хирпиисээр ханыень бодхоогоод, оройень хушажа байгаа. Удаань хорёо баригдаха юм. Соёлой гуламта ерэхэ намар тушаагдаха болзортой.

«ТУБАИР» гэһэн подрядна эмхи хүршэ Хила һууринда соёлой байшан барина. Мүнөөдэрэй байдалаар, сонхо, үүдэн табигдаа, дулаа оруулдаг соргонууд тодхогдоо, палааха һэлгүүлэгдээ. Оршон үедэ гол танхимай оройнь үндэр болгогдоно, байшанай нюур тала, хэрэлсы һэльбэн шэнэлэгдээ. Барилгын 80 хубинь дүүрээд байна. Энэл подрядна эмхи Ушарбайда 150 хүнэй һууритай соёлой байшан барина. Хуушан байшанай шатахадань, ушарбайнхид ондоо байшан соо соёлой ажал ябуулдаг һэн. Ушарбайн хажууда оршодог Бурятская станцида шэнэ бетон хүүргэ баригдана.

Хара-Шэбэртэ гурбан программаар барилгын ажал хэгдэнэ бшуу. Тодорхойлходо, «Демография» үндэһэн түлэблэлэй шугамаар тамирай талмай түхеэрэгдэнэ, «Формирование комфортной городской среды» - дурасхаалай хүшөө һэльбэн шэнэлэгдэнэ, хүдөөгэй территоринуудые хүгжөөхэ түлэблэлөөр һууринай түб гудамжада багашуулай наадаха талмайн һуури бэлдэгдээд байна.

Могойто тосхоной түб болбосон түхэлтэй болоно. Талмайн хажууда сквер байгуулагдана. Июлиин 1 болотор эндэ модод таригдаха, зайн галай хэрэгсэлнүүд тодхогдохо юм.

You have no rights to post comments