Могойтын аймагай Ага-Хангил нютагай залуушуул олониитэдэ туһатай ехэ ажал ябуулжа байна. Энэ ажал ударидагша 1988 оной Хутагто Балдановтай уулзажа, юун хэгдэнэб гэжэ һонирхобобди.
Ага-Хангилай тамиршад. Х.Балданов 2-дохи рядта зүүн гарһаа 6-дахи зогсоно.
- Хутагто Базаргуруевич, иимэ хэмжээ ябуулгануудые хэзээ эхилээбта?
- Нёдондо Могойтын аймагай Зунай нааданда нютагаймнай можо барилдаагаар, волейболоор шүүгдээбди. Тэрэнэй һүүлээр нютагайнгаа КСК (культурно-спортивный комлекс) һэргээлгын ажал эхилһэн байнабди. Юуб гэхэдэ, КСК-гай байшанай хүйтэн тулань хүүгэд, залуушуул бэеэ һорихо газаргүй болоод байгаа. Нэн түрүүн, би үетэн нүхэдтөө сонхонуудые хэе гэжэ дурадхааб. Удаан болонгүй, мүнгэ суглуулаад, нэгэ сонхо табяабди. Һүүлээрнь 1989 ба 1994 онойхид һубарин, сонхонуудые хүүлэбэ. Тиигээд нэгэ үедэ ажал тогтоод байгаа. Тиихэдэнь «Вайбер» гэһэн социальна сеть соо «СК Илалта» гэһэн группа нээгээбди. Тэндэһээ бүхы нютагаархид КСК-гай байшанда сонхо табина гэжэ дуулаа бшуу. Мүнөө 27 сонхо табигдаа, эндэ 1971 онойхидһоо эхилээд, 1995 он болотор залуушуул хабаадаһан байна. Хажуугаарнь нютагтамнай «Тёплый садик» гэһэн акци соносхогдоо. Хүүгэдэй сэсэрлигтэ нютагайхид баһа мүнгэ суглуулнабди. Мүнөө гурбан сонхо хэгдээд байна. Гансал хүүгэдэй унтадаг таһалгада табигдана. Энэ акци 1970 онойхид эхилжэ, сонхо табяа. Тиихэдэ выпускнигууд жэл бүри һургуулидаа сонхонуудые табидаг. Эхин шатын һургуулида сонхонууд табигдаха ёһотой. Эрхүүдэ ажаһуудаг ага-хангилайхид, оюутад «СК Илалта» группын гэшүүдтэй бильярдна стол абаад эльгээгээ. Тэрэнээ КСК соогоо һаядаа табихабди.
- Эдэ хэмжээ ябуулгануудта нютагайхид ямараар ханданаб?
- Булта һайнаар хандадаг, үүсхэл гаргадаг, жэшээнь, тиихэ байгаа, тиимэ ябуулга хэхэмнай гү гэжэ хэлэдэг эдэбхитэйшүүл олон. Энэ талаар ябуулга хэхэдэ, хүнгэн, амар байдаг. Мүнөө «СК Илалта» группа соо олон тээ ажаһуудаг хүбүүд, басагаднай, нютагһаа гараһан үмсын хэрэг эрхилэгшэд бии. Тэдэ һара бүри 50 түхэригһөө эхилээд, кассада мүнгэ оруулдаг. Тэрэ мүнгэеэ һургуулиин хүүгэдэй мүрысөөнүүдтэ ошоходонь гаргашалдагбди. Жэшээнь, суглуулһан мүнгөөр Ага, Могойто ошохо ерэхын бензин, эдеэ хоолоо даадаг. Ямар нэгэн турнирта хабаадахада, оролгын татабари түлэгдэдэг. КСК-гай байшанай гэрэлтүүлгын заһабарилга хэхэ хэрэгтэй. Эндэ һая группадаа бухгалтер-кассиртай болообди.
- Ямар мүрысөөнүүдые үнгэргөөд байнабта?
- Энэ зун 1988 онойхид мүнгэ суглуулаад, хотон хотоноороо футболой турнир үнгэргөөбди. Олон спонсорнууд байгаа. Энэ хадаа манай выпускын турнир болоо, жэл бүри хэдэг байхабди. Тиихэдэ нютагаймнай захиргаанай толгойлогшын кубогта хүртэхын түлѳѳ волейболоор мүрысөөн эмхидхэгдээ бшуу. Бүһэтэйшүүлэй, эхэнэрнүүдэй зургаа-зургаан можо хабаадаа. Зүүн хотон илажа, шүүһэн мүнгэеэ «СК Илалтын» жаса руу оруулаа һэн. Баһал жэл бүри үнгэргэдэг болохонь. Декабриин 11-дэ Футболой бүхэдэлхэйн үдэртэ зорюулжа, мини-футболоор мүрысөөн үнгэрөө һэн. Хамта зургаан можо хабаадаа. «Колос» хотон түрүү һуурида, хоёрдохидо «Дружба» гараа, гурбадахида - һургуулиин 10-дахи ангиин һурагшад.
- Хутагто Базаргуруевич, өөр тухайгаа богонихоноор хөөрэгты.
- Би МВД-гэй «Агинский» таһагта саг зуурын хаалтада дежурнын туһалагшаар хүдэлдэгби. Нүхэртэйб, хоёр хүүгэдтэйб. Нютагайхидай, залуушуулай иигэжэ тамираар һонирхожо, эрхилжэ, дэмжэжэ байхада, сэдьхэл баясадаг.
- Һайнта даа.
Дэлгэрэнгыгээр 1-2-дохи дугаарта.
