Тосхоной эрхим оюутан
Саяна Цыренова Агын багшанарай колледжын эрхим оюутан юм. Ага-Хангилай дунда hургуулида 7-дохи анги дүүргээд, Ага тосхон ерэжэ, хоёрдохи һургуулида орожо, һуралсалаа үргэлжэлүүлээ. Юһэдэхиие дүүргээд, Агын багшанарай колледжын тамирай таhагта ороо hэн. Тэрэ гэhээр hуралсалдаа хододоо эрхимээр hурана, бэеэ элүүржүүлхэ, хүдэржүүлхэ талаар ажал ябуулдаг, ниитын хэмжээ ябуулгануудай эдэбхитэн. Дүрбэдэхи жэлээ группынгаа һуралсалай талаар харюусалгатай ажал ябуулна. Эрхим оюутан hэн тула тамирай мүрысөөнүүдтэ ба эрдэм шэнжэлэлгын конференцинүүдтэ, семинарнуудта амжалтатай хабаадаа. Саяна хододоо урагшаа эрмэлзэжэ, залиршагүй зали согтойгоор алибаа хүсэлөө бэелүүлжэл ябадаг басаган юм. Баскетбол, волейбол, теннис, шатар наададаг, колледжынгоо суглуулагдамал можын бүридэлдэ волейболоор хизаарай мүрысөөнүүдтэ шангай түрүү hууринуудта гарадаг. Хүнгэн атлетикээр холын зайда гүйхэ дуратай. «Агинская правда» һониной шангай мүрысөөндэ оло дахин түрүүлһэн байна. Саяна хатархашье дуратай, англи хэлэн дээрэ номуудые уншадаг.
Ага-Хангил нютагта тоонтотой, эрмэлзэл дүүрэн Саяна басаганай амжалтанууд эдир наhанhаа эхитэй. Нютагайнгаа hургуулида hуража байхадаа, волейболоор аймагай, тойрогой мүрысөөнүүдтэ, буряад хэлэн ба литератураар олимпиадануудта эрхимээр хабаададаг байгаа. Харин 9-дэхи ангида Агын hургуулида ороходоо, тэрэл хэбээрээ hургуулиингаа омогорхол ябаа, 7-9-дэхи ангинуудта классайнгаа старостаар hунгагдаhан. Хари хэлээр, математикаар, ород хэлээр олимпиадануудта, хүнгэн атлетикээр, үндэрые харайлгаар, шатараар, 1500 метрэй зайда гүйдэлөөр ба бусад элдэб хэмжээнэй мүрысөөнүүдтэ хабаадаһан шуу. Хүнгэн атлетикээр тойрогой мүрысөөндэ 2-дохи hуури эзэлhэн. Волейболоор hургуулиингаа суглуулагдамал можын гэшүүн байгаа. Мүн соёлой байшанай хатарай клубта ябажа, тайзан дээрэ хатаржа, дуулажа, нютагайхидаа хужарлуулhан юм.
Саяна Цыреновагай бэлиг шадабари онсо тэмдэглэгдэжэ, үнгэрэгшэ жэлдэ Агын багшанарай колледжын эрхим оюутадай тоодо орожо, тусхай нэрэ зэргэдэ хүртэhэн намтартай. Саяна Анатольевнагай суг һурадаг хүбүүд басагадаараа үелжэ, согтой зугаатайгаар һуража байхадань, COVID-19 үбшэн һүжэржэ, гэртээ номоо үзэдэг болоо. Оюутанай хэлэһээр, иимэ аргаар һуралсал гарахада, ехэ муу. Нэн түрүүн нү-хэдтэеэ, багшанартаяа уулзаха аргагүй. Теэд яахаб, коронавирусай тахалай үедэ гэртээ һууха хэрэгтэй. Колледждо һураха үшөө нэгэ жэл үлэбэ. Сентябриин 1-дэ суг һурадаг нүхэдтэеэ партын саана һуужа, номоо үзэхэ аргатай болохоёо тэрэ найдана.
Хизаарай эрхим тамиршан
Үбэр Байгалай хизаарай дунда тусхай мэргэжэлтэ hуралсалай эмхинүүдэй оюутадай дунда «Эрхим тамиршан» гэhэн нэрэ зэргэдэ хүртэhэн Солбон Базаров эдир наhанhаа тамиршан болохоёо хүсэдэг байгаа. Сэнхир экранаар мэдээжэ тамиршадые хаража, hажаахые оролдодог hэн. Табтаанайнгаа дунда hургуулиин hурагша ябахадаа, Солбон Базаров тамирай секцинүүдтэ нэтэрүүгээр ябаа. Арбан дүрбэ наһатайдаа һур харбалгын секцидэ ябажа эхилһэн. Юһэдэхи анги дүүргээд, Агын багшанарай колледжын оюутан болоо. Колледждо ороод, тамирайнгаа һорилго улам эршэдүүлээ. Һур харбалгаар бэеэ үсэдөөр hорижо, Россиин габьяата һоригшо Баяр Цырендоржиевай хүтэлбэрилдэг һур харбалгын секцидэ ябадаг болоо. Классическа номоор мэргэнээр харбадаг болоһон байна. Мүрысөөндэ хабаадажа, Россиин олон хото городуудаар ябаһан. Үнгэрэгшэ жэл Улаан-Үдэ хотодо үнгэргэгдэһэн Россиин кубогта хабаадажа, алтан ба мүнгэн медальнуудта хүртэһэн байха юм. Мүнөө үедэ коронавирусай тараад байхада, Солбон талаар ябаха аргагүй, гэртээ хорёо соогоо һорилго хэнэ. «Хэзээ энэ үбшэн дүүрэхэ гээшэб. Дүүрэхэдэнь, тамирай байшан соо (ЦСП) багшынгаа хажууда һорилго хэхэеэ хүлеэнэб», - гэжэ Солбон һанаата болон хэлэнэ.
Байгша ондо Агын багшанарай колледж 109 оюутад дүүргэжэ байна. Тэрэ тоодо тамирай факультет хорин оюутад дүүргэнэ. Солбон гүрэнэй шалгалтануудые «дүрбэ» ба «таба» сэгнэлтэнүүд дээрэ баряад, мүнөө диплом бэшэнэ. Дип-ломынь һур харбалгада зорюулагданхай. Хүтэлбэрилэгшэнь - Цыпылма Чирниновна Жимбаева, кураторынь - Рабдан Цыренжапович Доржиев. Солбонтой суг хамта дүрбэн жэлэй туршада һуража ябаһан нүхэдынь баһал дипломоо бэшэжэ сүлөөгүй байнад. Зарим тэдыень нэрлэбэл, Очир Иринчеев (Сагаан-Уула) - алишье талаар бэрхэ оюутан, Бато Тунгаланов (Амидхааша) - волейбол наададаг, Цыренжаб Шагдаров (Һүдэнтэ) - футбол наададаг, Эрдэни Цынгуев (Амидхааша) - волейбол наададаг, Руфина Тумурова (Ага тосхон) - һур харбадаг, Радмила Гончикова – боксёр басаган. Солбон Базаров колледж түгэсхөөд, саашадаа багшын дээдэ һургуулида һуралсалаа үргэлжэлүүлхэ түсэбтэй. Солбоной эжы Людмила Тумуровна Базарова эхин шатын ангинуудай багша юм. Солбон Сандан, Содном, Сультим аха дүүнэртэй, Сарюна дүү басагатай.
Ударидаха, эмхидхэхэ шадабаритай
Оловянна тосхоной Егор Митюков колледждоо магтаалтай ябадаг. Хотоной можо байгуулжа, футбол эмхидхэдэг hэн. Залуушуулые тамирта дурлуулха талаар ажал ябуулдаг, урагшаа hанаатай, оюутадайнгаа түлөө үнэн сэдьхэлhээ hанаата болодог хүбүүн юм. Футбол, волейбол наададаг эрхим тамиршан, илангаяа хүндэ атлетикээр бэеэ һоридог. Егор нэгэдэхи курсһаа хүндэ атлетикээр (пауэрлифтинг) «Титан» гэһэн тамирай секцидэ ябажа, мэдээжэ һоригшо Игорь Летяевта заалгадаг. Мүрысөөндэ хабаадажа, Могойто, Дулдарга, Шэтэ ошоһон юм. Зохёохы шадабаритай КВН-дэ хабаадагша, үетэн нүхэдөө ударидагша гээд онсолон тэмдэглэе. Багшанарай ба гэртэхинэйнгээ дурадхалаар Егор Агын багшанарай колледждо орожо, хүүгэдтэ ехэ дуратай байhандаа, ёhотойл мэргэжэл шэлэhэнээ мэдэрээ. Бүлэг соогоо ударидагшадай нэгэн юм. Үнгэрэгшэ hуралсалай жэлдэ тэдэ «Колледжын эрхим бүлэг» гэжэ нэрлэгдэжэ, дипломуудаар шагнагдаhан байна.
Март һарада карантинай эхилхэдэ, Егор Оловяннаяа бусажа, дистанционно аргаар һуража эхилээ. Нүхэдэйнгөө дунда шаг шууяан соо номоо үзэжэ байһан аад, компьютерай аргаар һурадаг болоходоо, Егорто түрүүндээ тааруугүй байгаа. Тииһээр дадаа. Колледж дүүргээд, Егор Митюков мэргэжэлтэн боложо, нютагаа бусаха хүсэлэнтэй.
Ерээдүйдэ эдиршүүлые хүмүүжүүлхэ
Наталья Юндунова Дээдэ Саһашын hургуули дүүргээд, тус колледжын «Дошкольное образование» таhагта орожо, 1-дэхи курс дүүргэбэ. Наталья семестрhээ семестртэ гансал эрхим сэгнэлтэтэйгээр шалгалтаяа баридаг. Хэшээлэй hүүлээр ехэнхи сагаа номой санда үнгэргэдэг, тиихэдээ гэр hургуули хоёрой хоорондо хододоо номуудаар дүүрэн хүндэхэн сүүмхэтэй алхалдаг. Сүлөө сагтаа волейбол наадаха, дуу дуулаха дуратай. Мүнөө синтезатор дээрэ наадажа hурана. Колледждо ороhоор, олон шадабаринуудаа элирүүлнэ, зуражашье шадаха байшоо. Бүхы шадабаринуудынь шэлэhэн мэргэжэлдэнь сэхэ хабаатай. Тэрэ гол мэргэжэлhээ гадна физкультурын, зурагай, хүгжэмэй хүтэлбэрилэгшөөр хүдэлхэ аргатай бшуу. Жэлhээ жэлдэ эрхим hуралсалайнгаа түлөө колледжын захиргаанай зүгhөө грамотануудаар шагнагдаhан. Болот нүхэрынь хододоо дэмжэжэ, алибаа асуудал суг хамта шиидхэдэг заншалтай. Нүхэрынь Агын 1-дэхи hургуули мүнгэн медальтайгаар дүүргээд, Шэтын наймаагай-экономическа колледж улаан дипломтойгоор түгэсхэhэн. Тиимэhээ эдэ хоёр залуушуулда эрдэм мэдэсын талаар бэе бэетэеэ хубаалдаха юумэн олон олдодог. Саашадаа Наталья колледж дүүргэжэ, мэргэжэлээ дээшэлүүлхэ хүсэлтэй. Эгээ шухалань гэхэдэ, хэзээшье, эдиршүүлые хүмүүжүүлгэ гол ажалынь болохо.
