Һая мүндэлһэн 2017 оной январиин 17-ой жабартай үдэр буряад арадаймнай үзүүр хүбүүдэй нэгэн ябаhан, бурханhаа үршөөгдэhэн бэлиг шадабаритай хүтэлбэрилэгшэ, бэрхэ түрүүлэгшэ, Агууехэ Эсэгын дайнай ветеран, Социалис Ажалай Герой Бальжинима Мажиевич Мажиевай түрэһөөр 100 жэл тэмдэглэгдэбэ.
Ажалай Баатарай тэбхэр ойдо, һаруул һайхан дурасхаалда зорюулагдажа, Г.Цыбиковэй нэрэмжэтэ Агын үндэһэтэнэй музей соо “Музей в музее” гэһэн хэмжээ ябуулга эмхидхэгдээ, ехэ үзэсхэлэн дэлгээгдээ.
Январиин 28-да Хара-Шэбэртэ эрдэмэй болон дүршэл абалгын конференци, музейн таһалгын нээлгэ, эдир хүбүүдэй хоорондо дүрэ буляалдаата барилдаагаар мүрысѳѳнүүд үнгэргэгдэхэ юм.
Социалис Ажалай Герой, Агын Буряадай автономито тойрогой, мүн Шэтын можын хүндэтэ эрхэтэн, РСФСР-эй Хүдөө ажахын габьяата хүдэлмэрилэгшэ, Ленинэй, Октябриин Хубисхалай, Улаан Одоной, Ажалай Улаан Тугай, Арадуудай Хани барисаанай орденгуудай кавалер Бальжинима Мажиевай нэрэ дуулаагүй, мэдээгүй хүн байхагүй.
Б.Мажиевта Ажалай Баатарай нэрэ зэргэ олгогдоhониинь юрэ бэшэ: ажал хэрэгтээ абьяас бэлигтэйгээр хандажа, аша габьяа туйлажа, арад зонойнгоо хүндэдэ, гүрэн түрын шан хайрануудта хүртэhэн ёhотойл дээдэ гарай хүтэлбэрилэгшэ ябаһан. Ажалаараа суурхаһан суута түрүүлэгшэ тушаа мэндэ ябахадань ба алтан дэлхэйтэеэ хахасаһан хойноньшье газетэ ба телевиденидэ оло дахин гаражал, дурсагдажал байдаг юм. Ажахы ба ѳѳр тушаань хэды олон репортажнууд харуулагдааб, мэдээсэл, зураглалнууд бэшэгдээб - тоолошогүй. Тэрэнэй ажалай баян намтар, ажал хэрэг, аша габьяа тушаа тойрогоймнай олон хүн мэдэхэ, дуулаһаншье, зүгѳѳр залуу үетэндэ hануулжа, мэдүүлжэ, дамжуулжа байхань шухала.
Дэлгэрэнгыгээр 3-дахи дугаарта.
