Байгша оной январиин 27-до Агын соёлой байшанай танхим соо «Агинский Бурятский округ-2016» гэһэн гаршаг доро үнгэрэгшэ жэлэй дүнгүүдтэ болон забайкалиин нарин нооһото үүлтэрэй хонидой байгуулагдаһаар 60 жэлэй ойдо зорюулагдаһан үзэсхэлэн дэлгээгдээ бэлэй. Эндэ хабаадаһан зонтой хѳѳрэлдѳѳ эмхидхэһэн байнабди.
ДУЛДАРГЫН 1-ДЭХИ ДУНДА ҺУРГУУЛИ
Үзѳѳн нютагһаа гарбалтай Батор Арсаланович Цыбенов Дулдаргын 1-дэхи дунда һургуулида ажамидаралай аюулгүй байдалай үндэһэн һуури тухай хэшээлнүүдые 17-дохи жэлээ заажа ябана. Батор Арсаланович ажалайнгаа намтар Үзѳѳнэй дунда һургуулида эхилһэн. Багшын ажалай үрэ дүн тэрэ дары зондо харагдадаггүй, тэдэ ургажа ябаһан залуушуулда үдэр бүри эрдэм ном заажа, үхибүүдые зүб тээшэнь хүмүүжүүлжэ ябадаг гээшэ, үнэн дээрээ, энэ тиимэшье бэлэн хэрэг бэшэ. Хэдэн жэлэй үнгэрһэн хойно үхибүүдэй багшадаа баяр баясхаланиие хүргэхэдэнь, энээнһээ һайхан юун байхаб даа?! Батор Цыбенов багшын уялгануудые һайнаар мэдэдэг.
Б.Цыбенов.
Ургажа ябаһан эдиршүүлые Эхэ орондонь дуратайгаар хүмүүжүүлхые оролдодог гэхэдэ, алдуу болохогүй. Батор Арсаланович хѳѳрэлдѳѳн дундаа: «Санкт-Петербургһаа эхилээд, Владивосток хүрэтэр 10 һурагшадни сэрэгэй дээдэ һургуулида һуража байна. Мүнѳѳ дүүргэхэ хэды хүбүүдни баһал сэрэгэй дээдэ һургуулида ошохо дуратай. Саашанхи харгыдань гэжэ тэдээндэ хасагай дансануудые барюулхаб. Шадаха аргаараа туһалхаб», - гээд тэмдэглэнэ һэн.
ҺҮДЭНТЫН ДУНДА ҺУРГУУЛИ
Хорин нэгэдэхи зуун жэл - компьютерай ба робототехникын үе. Мүнѳѳ һургуулинуудта робототехникын хэшээл заагдана. Забайкалиин хизаарай һургуулинууд баһал инновационно шэглэлһээ үлэнэгүй. 2012 онһоо Һүдэнтын дунда һургуулида залуухан, урагшаа һанаатай багша Булат Жамбалов робототехникэ ба информатика заажа эхилһэн.
Үзэсхэлэндэ буряад малгайтай, дэгэлтэй рободууд, хорото абарга абаахай ба гайхалтайгаар хэгдэһэн Эйфелевэ башни, вертолёдой дүрсэнүүд дэлгээтэй байгаа.
Үзэсхэлэндэ дэлгээтэй рободууд.
Робототехникын хэшээл тухай Булат Дашинимаевич иигэжэ тайлбарилба: «Робототехникэ - электронико, механика, информатика гэхэ мэтэ эрдэмэй һалбаринуудһаа дулдыдадаг хэшээл юм». Табан жэл соо Булат Жамбаловай һурагшад робототехникын хэшээлдэ робот болон элдэб янзын дүрсэнүүдые дархалжа, түрүүн аймагай, тойрогой, хизаарай ба бүхэроссиин хэмжээнэй конкурснуудта илажа, шангай һууринуудта хүртэжэ эхилһэн.
Эдэбхитэй залуу багша 2-4-дэхи ангиин һурагшадай ухааень гүйлгэжэ, конструкторнуудаар элдэб юумэ дархалжа һургадаг. 5-8-дахи ангинуудта 3D ручка зүб мүрѳѳр хэрэглэжэ һурадаг. 9-11-дэхи ангинуудай үхибүүд физикын, информатикын хэшээлнүүдтэ үзэһэн мэдэсэнүүдээ хэрэглэжэ, түмэр зүйлнүүдые гагнажа, электрическэ ба электронно приборнуудтай хүдэлжэ һурадаг байна.
Дэлгэрэнгыгээр 12-дохи дугаарта.
