Агуу Илалтын үдэр угтуулан, Агын тойрогой Ветерануудай зүблэлэй түрүүлэгшэ Цырендаши Сандановтай уулзажа, зүблэлэй мүнѳѳдэрэй ажал хэрэгүүдээр һонирхоһон байнабди.
Цырендаши Цыбенович иигэжэ хөөрэбэ: «Тойрогой нютагуудта ветерануудай дүшэн эхин эмхи ажал ябуулна. Мүнөөдэрэй байдалаар, тойрогто арбан юhэн мянган ветеранууд тоологдоно, тэрэ тоодо Эсэгэ ороноо хамгаалгын дайнда хабаадаhан гушан долоон хүн мүнөө мэндэ ябана. Гушан долоон ветерануудай табаниинь Баруун фронтдо ябаhан. Тиихэдэ дайнай ара талын ажалда хүдэлhэн 399 ветеранууд, дайнда хабаадаһан нүхэрөө гээгдүүлhэн 183 эхэнэрнүүд тоологдоно. Бэшэниинь - пенсионернүүд.
Ц.Санданов.
Анхан машина үгэхэ, телефонииень түлэхэ, гэр байдалыень заhажа үгэхэ г.м. олон талаhаа ветерануудта туhа хүргэгдэдэг һэн hаа, мүнөө үедэ мүнгэнэй дутагдалhаа хуу гэдэргээ гарашоо. Тиигэбэшье Агууехэ Эсэгын дайнда хабаадаhан ветерануудаа гэр байраар хангаха тухай Россиин Президентын гаргаhан тогтоолоор, Эсэгын дайнда хабаадагшад ба дайнда хабаадаһан нүхэрөө гээгдүүлhэн эхэнэрнүүд булта гэртэй болоhон. Хүдөө нютагуудта сонхыень шэнэлэн hэлгүүлхэ мэтын туhа хүргэгдэдэг. Ара талын ажалшад гэхэдэ, манай тойрогто ушаргүй ядажа байhан зон байхагүй. Буряадууднай гэртэхинээ орхидоггүй зантай ха юм. Булта гэр байратай, үгышье hаа, хүүгэдэйнгээ хажууханда нэгэ жэжэхэн гэртэй байна гээшэ ааб даа. Энэ асуудалаар нэгэн-хоёр лэ хүн ябаа hаа ябаха. Ябаашье hаа, Дагуурhаа гү, хаанаhааб даа ондоо тээhээ ерэhэн хүнүүд намда ородог. Бэшээр манайхин энэ асуудалаар ябадаггүй. Манай тойрогто ондоо тээhээ ерэhэн гурба дүрбэн лэ хүн байха. 1987 оной февралиин 7-до учредительнэ конференци хэгдээд, тэндэ тойрогой дайнай ба ажалай ветерануудай эмхи гэжэ бии болоhон. Удангүй эмхиимнай нэрэдэ «Зэбсэгтэ хүсэнүүдэй эмхи» гэһэн үгэнүүд нэмэгдээ һэн. Мүнөө «Боевое братство» гэhэн Агын тойрогой таһаг байна ха юм. Эндэ чечен, афган дай үзэhэн дүрбэн зуугаад хүбүүд бүридхэлдэ абтанхай. Эсэгын дайнда хабаадаhан ветеранууд жэлhээ жэлдэ үсөөн боложол байна, гушан долоон ветеранууднай булта ерээдтэй шахаhан гү, ерэ наһаяа дабаһан - хойто жэл булта байхыеньш мэдэхын аргагүй. Тиихэдэнь тойрогой Ветерануудай зүблэл ябан ошон энээхэн хүбүүдтэеэ хүдэлхэмнай гээшэ ааб даа. Залуушуулаа эдээнтэйл уулзуулжа байха болонобди.
Дэлгэрэнгыгээр 18-дахи дугаарта.
