Тэбхэр арбан жэлэй саана Агада Шэтэ можотой ниилэхэ тухай бүгэдын һанал хуряалга (референдум) үнгэргэгдөө һэн. Мүнөө тэрэ үеын үйлэ хэрэгүүдтэ сэгнэлтэ үгэхэ талаар бэе бэедээ харша хоёр һанамжа бии. Нэгэ талань тойрогой анханай хүтэлбэриие хараадаг, нүгөөдүүлынь - үмөөрдэг. Тиихэлээрээ зэмэлхэ хүнүүдынь тойрогто түрөө гараагүй зон, харин хамгаалагшадынь Агадаа байдаг хүнүүд.
Б.Жамсуев.
1992 ондо бэеэ даанги болоходоо, Жамсуевай команда түргэн шууд хүгжэлтын тула олон замуудые туршаа. Зүгөөр тэдэнь оройдоол 70 мянган шахуу ажаһуугшадтай гурбан хүдөө аймагһаа бүридэһэн багахан можо нютагта таараагүй бшуу. Һүүлэй һүүлдэ офшорно талмайн түхэлтэй тусхай эдэй засагай дэбисхэр эмхидхэн байгуулха шиидхэбэри абтаа юм. Энэ хадаа Монако, Андорро, Лихтенштейн, Багамы, Кипр болон бусад орон газарнуудта хүгжэнги. Тиин Агын ганса нэгэ байшан соо аяар хэдэн арбаад компани бүридхэлдэ абтаһан байха юм. Нютагай хэн нэгэн Москваһаа факс абаад, хэрэгтэй дансануудыень банк абаашаха. Энээнэйнгээ түлөө тэрэ үеынхеэр яһала ехэ мүнгэ абадаг байһан. Элдэб янзын компанинууд, тэрэ тоодо уһанай онгосоор ябалгын компанишье бии бэлэй. Үргэн талата Ага 15 корабльһаа бүридэһэн өөрын флотилитай байгаа. Мүнөө ехэ далайгүй Монгол гүрэн туг дороо суднануудые бүридхэлдэ абана гүб даа, тэрээн шэнги. Офшорно талмай байгуулһаниинь багахан тойрогой хэмжээндэ аргагүй ехэ мүнгэн эрьедэг болоо. 1999 ондо Ага Ородой Холбоото Уласай (Российская Федерация) тон үгытэй можо нютагуудай нэгэн байһан аад, 2005 ондо ажаһуугшадайнгаа юумэ худалдажа абаха арга шадалаар хүршэ можо нютагуудтай - Шэтын можо болон Буряад Уластай зэргэ болоо. Оройдоол табан жэлэй туршада (1999-2004) Агада үгытэй байдалай хэмжээн 97 процентһээ 36 болотор доошолоо.
Дэлгэрэнгыгээр 20-дохи дугаарта.
