Энэл үдэр Агын тойрогой Захиргаанда Россиин 15 эрхим багшанарай тоодо ороһон Агын 2-дохи дунда һургуулиин тоо бодолгын багша Соёлма Батоболотоватай уулзалга үнгэрөө.
Д.Цынгуева (зүүн гараа), С.Батоболотова.
Соёлма Эрдэмовнагай амжалта хадаа хизаарай түүхэдэ тон һайн дүн болоно. Энэ конкурсдо хабаадаха гэжэ яагаад шиидээбта гэһэн асуудалда багша иигэжэ харюусаба: «Бишье бэшэ, коллективнай иимэ шиидхэбэри абаа. 2005 ондо Агын аймагай болон тойрогой багшанарай конкурсдо хабаадаад, лауреат болоо һэнби. Тиимэһээ дүршэлтэйшэг болоһон байгааб. Һургуулиимнай хүтэлбэри намайе шэлээ, хүсэ шадалдам этигэһэндэнь коллективтээ баяртайб. Аймагай конкурсын илагшад - 3 багшанар региональна конкурсдо ошообди, тиигээд Забайкалиин хизаарай «Эрхим багша-2017» конкурс шүүхэдээ, федеральна шатада хабаадаха аргатай болооб. Аймшагтай байгаагүй, харин ехэ харюусалгатай, өөрынгөө шадабари туршахаа, баталхаяа һанааб - энээниие шадаабди, команда хүдэлөө гээшэ ааб даа».
Соёлма Эрдэмовнагай гол һургагшань, хажуудань суг ябаһан Агын 2-дохи дунда һургуулиин директорэй эрдэмэй-методическа талаар орлогшо Дулмажаб Цынгуева иигэжэ тэмдэглэбэ:«Иимэ ехэ амжалта асархын тула олиггүй оролдолго гаргагдаа. Тон урид хэлэхэ байнаб, Соёлма Эрдэмовна бидэ хоёр Агын Буряадай автономито тойрогой һуралсалай хүмүүжэмэлнүүд болонобди. Булта мэдэнэбди, тойрогой һуралсал ходо үндэр хэмжээндэ юм. 1990-ээд онуудта бүхы гүрэнэй һандаржа байхада, тойрогой һуралсал халташье доошоо ороогүй, тэрэ үедэ залууршанаар Ц.Намсараева ябаһан. 6-7 һара салингүй хүдэлөөшье һаа, энэмнай һуралсалай шанарта нүлөө үзүүлээгүй. Тойрогой һуралсалай мүнөөнэй амжалтада тэрэ үеын hуралсалай талаар хүтэлбэрилэгшэдэй, Агын социальна һалбариин ажалтадай мэргэжэл дээшэлүүлгын институдай хүдэлмэрилэгшэдэй хубита олиггүй ехэ. Б.Дамбаевагай ударидалга доро институдай һуралсалай шэнэ удха шанар бэлдэхэдээ, 10-15 жэл болоод тэрэмнай бүхэроссиин федеральна стандартын эхин болохо гэжэ тухайлхагүй ябаабди. Конкурсдо хабаадажа ябахадаа, тойрогой һуралсалай һалбарида хэгдэжэ байһан ажалай шанартайе ойлгообди. Соёлма Эрдэмовнагай илалта тэрэ үедэ тойрогой һуралсал, институт толгойлжо ябаһан зоной нүлөөгүйгөөр байхагүй һэн».
Дэлгэрэнгыгээр 42-дохи дугаарта.
