Агын Буряадай тойрогой Түлѳѳлэгшэдэй суглаанай ээлжээтэ зүблѳѳн түрүүлэгшэ Цырен Цыреновэй хүтэлбэри доро октябриин 12-то үнгэрбэ. Үдэрэй гаршагта 6 асуудал гаргагдаһан байна.

 

Зүблѳѳнэй үедэ.

 

МҮНХЭЛЭЛТЫН ЖАСАДА

Түрүүшын асуудалаар Агын тойрогой дэбисхэр дээрэ социальна мүнхэлэлтын жасын таһагай ажаябуулгын гол шэглэлнүүд болон дүнгүүд тухай асуудал харагдаа. Таһагай дарга Аюр Баяновай мэдээсэһээр, 2017 оной июлиин 1-эй байдалаар, тойрогой дэбисхэр дээрэ 1111 мүнхэлүүлэгшэд (страхователь) бүридхэлдэ абтанхай. Харин 2016 оной июлиин 1-эй баримтануудаар 1225 мүнхэлүүлэгшэд байгаа. Байгша оной түрүүшын хахад жэлэйнгээ тоосоо мүнхэлүүлэгшэдэй олонхинь электронно гар табилгатайгаар хэһэн байна. Иимэ маягаар тоосоонуудай олошорһониинь жасын мэргэжэлтэдэй ябуулһан ойлгууламжын ажалай үрэ дүн болоно гэжэ элидхэгшэ мэдүүлээд, мүнхэлүүлэгшэдэй түлбэриин үри шэри хүндүүлхэй асуудал болоод байна гээд хэлэбэ. Июлиин 1-эй байдалаар, 374 мүнхэлүүлэгшэд үритэй байна, тэдэнэй 75-иинь 100 түхэриг хүрэтэр. Эгээл ехэ үритэй эмхи зургаануудай тоодо «Кварц» гэһэн алта бэдэрэлгын артель, Хара-Шэбэрэй сурьма олзолдог комбинат болон Шэнэ Орловскын ГОК нэрлэгдээ. Мүн тиихэдэ һуралсалай һалбариин бюджетнэ эмхинүүд ехэ үритэй байна.

Хээлитэй болон нарайлһан эхэнэрнүүдые, нарай хүүгэдые эмнэлгын туһаламжаар хангахын тула социальна мүнхэлэлтын жасын таһаг тойрогой эмнэлгын эмхинүүдтэй 3 хэлсээ баталһан байна. Тиихэдэ санаторно-курортно эмнэлгэдэ, үбшэнэй хойшолон усадхаха хэрэгсэлнүүдтэ хэрэгтэй зонһоо мэдүүлгэнүүдыень абажа, дээдэ зургаанууд руу ябуулдаг байна.

А.О.Баяновай мэдээсэл шагнаад, түлѳѳлэгшэд нютаг һуурингуудай хүтэлбэрилэгшэдтэ хандажа, мүнхэлүүлэгшэдэй түлбэриин үри  шэри суглуулал- саха талаар арга шадалаараа туһалхыень зууршалха тухай шиидхэбэри абаба.

 

«ТОЛОН» БА ЭХЭ ХЭЛЭН

Бүгэдэ буряадай «Толон» һониной байдал болон хүгжэлтынь замууд тухай элидхэл «Толон» һониной ахамад редактор Цыцык Тумурова хэбэ. Нэн түрүүн ахамад редактор газетын түүхэ, гол зорилгонууд болон удха, гаршагууд тухай хѳѳрѳѳ. Һүүлээрнь редакциин хүндүүлхэй асуудалнуудта түлѳѳлэгшэдэй анхарал хандуулһан байна. Тодорхойлбол, редакциин ажалтадай салин ажалайнь хэмдэ хүрэхѳѳр бэшэ бага. Бага салинда ажал хэхэ зониие барихань сагай ошохо бүри хэсүү болоно. Энэ нэгэдэхеэр. Хоёрдохёор, литературна буряад болон ород хэлэнүүдые адли тэгшэ һайнаар мэдэхэ мэргэжэлтэдые – сэтгүүлшэдые олохонь бэрхэтэй. Гурбадахяар, хинан заһабарилгын, оршуулгын ехэ ажал гарадаг, юундэб гэхэдэ, сэбэр буряад хэлэн дээрэ интервью үгэхэ зон тон хомор, редакциин хаягаар ороһон материалнуудта үзэгэй, сэглэлтын тэмдэгэй алдуунууд, һуурияа олоогүй мэдүүлэлнүүд олон байдаг шуу. Эдэ бүхы хүндүүлхэй асуудалнууд түрэл хэлэнэй түбэгтэй байдалда ороод байһые гэршэлнэ.

 

 Дэлгэрэнгыгээр 42-дохи дугаарта.

 

You have no rights to post comments