Улаан-Үдэ хотодо оршодог Монгол ороной консульствын түлөөлэгшэд элшэн сайд Дамдин Чадраабалай ударидалга доро ноябриин 9-дэ Агын Буряадай тойрог хүрөөд ошоһон байна.
Тойрогой Захиргаанай хүтэлбэрилэгшэ Б.Доржиев элшэн сайд Д.Чадраабалда
Агын Буряадай тойрогой 80 жэлдэ зорюулагдаһан номуудые бэлэг бариба.
Тойрогой Захиргаанай хүтэлбэрилэгшэ Б.С.Доржиев ба Д.Чадраабал албан ёһоной уулзалга дээрэ Агын Буряадай тойрогой ба Монголой хоорондохи харилсаа холбооной ехэ удха шанарыень тэмдэглээ. Экономикын, хүдөө ажахын, соёлой, аяншалгын, һуралсалай, тамирай талаар суг ажаллаха арга боломжонууд, саашадаа хамта алиш талада олзотой ажал ябуулха тухай хөөрэлдөө. «Урда сагһаа хойшо монгол, буряад арадууд хилээр хубаагданхай байһан гээшэ ааб даа. Мүнөө визэгүйгөөр хилэ гараха аргатай болоһон хадаа бэе бэедээ айлшалжа, хани барисаатай байял», - гэжэ Б.С.Доржиев хэлэбэ.
Элшэн сайд Агын тойрог түрүүшынхеэ ерээ, тэрэ эндэ ажаһуудаг Монголой эрхэтэдтэй, тэдэнэй тоодо Агын, Могойтын һуралсалай эмхинүүдтэ һурадаг Дорнод, Хэнтэй аймагуудай, Улаан-Баатар хотын монгол оюутадтай уулзажа, ажабайдалаарнь һонирхоо бшуу. Консульствын түлөөлэгшэд оюутадта һуралсалдаа харюусалгатай, амжалтануудые туйлажа, болбосорол ехэтэй ябахыень үреэгээ. Монголой түлөөлэгшэд Г.Цыбиковэй нэрэмжэтэ Агын үндэһэтэнэй музей, Агын «Дэчен Лхундублинг» дасан, Могойтын 3-дахи дунда һургуули, Могойтын хүдөө ажахын үйлэдбэриин техникум болон бусад социальна эмхинүүдээр ябажа хараһан байна.
Түлөөлэгшэдтэй хамта элшэн сайдай наһанайнь нүхэр Дамиран Майцэцэг (мэргэжэлээрээ багша) ябалсаа. Тэрэ оюутадые сагаан эдеэнэй дээжээр хүндэлжэ баярлуулаа.
Дэлгэрэнгыгээр 46-дахи дугаарта
