Зугаалайда олзын хэрэг эрхилдэг зон үсөөн бэшэ. Тэдэнэй нэгэн - Галина Цымжитова, пекарни нээжэ, нютагайнгаа зониие хилээмээр хангана.
Г.Цымжитовагай пекарнида.
Талханай зүйлнүүдээр элдэб хоол болгодог булан руу орожо, ажабайдалтайнь танилсаабди. Үүдэ татажа, богоһо алхажа оромсоорнай, һая болгогдоһон хилээмэнэй, булочкануудай хоншуухан үнэр анхилжа байгаа һэн. Сагаан халаад үмдэһэн ажалшад стол дээрэ талха худхажа, эһэхыень табижа байба. Кондитер Оксана Номоконова пеэшэн сооһоо булочка, пирог, печени, коржик г.м. талханай зүйлнүүдые гаргажа, наймаада табина. Хилээмэнэй цехые даагша Галина Цымжитовагай хөөрэһөөр, гурбан жэлэй саана, 2014 ондо, гэр бүлөөрөө - айлай зургаан эгэшэ дүүнэр зүбшэлсэжэ, олзын хэрэг эрхилхэ тухай хэлсэһэн байха юм. Түрүүн хуушан пекарнида ажаллажа, ажалай дүршэлтэй болоод, Могойтын аймагай захиргаанай экономикын таһагые тэрэ үедэ даажа ябаһан Баира Дашидымбрыловада хандажа, ушараа мэдүүлһэн байна. Удангүй бага олзын хэрэг эрхилэгшэдэй хоорондо үнгэргэгдэдэг конкурсын грантда хүртэхэеэ дансануудаа бэлдэһэн байна. Тиигэжэ 300 мянган түхэригэй грантда хүртэхэ эрхэтэй болоо һэн. «Тэрэ 300 мянган түхэригөөр юу абахаб» гэһэн бодол Галина Васильевнагай толгойдо ороо бшуу. Могойто, Шиилхэ, Оловянна тосхонгуудаар ябажа, пекарнинуудые хараа, хилээмэ болгодог үйлэдбэринүүдтэйнь танилсаа, интернет соо орожо бэдэрээ. Һүүлэй һүүлдэ интернет соо бэдэрһээр, Новосибирск хотын «Хлебсельмаш» эмхиин сайт нээжэ, пекарнида хэрэгтэй хэрэгсэл, түхеэрэлтэнүүдые олоо. Сэнгүүдыньшье бараг. Зайн галаар бэшэ, харин түлеэгээр халадаг пеэшэн, талха худхадаг, һагшадаг түхеэрэлтэнүүдые, талха дэлгээдэг стол, шэгнүүр, хилээмэнэй формонуудые ба бусад хэрэгсэлнүүдые Новосибирск захяа. Пеэшэн соо нэгэ доро 60 хилээмэ болгоно, үйлэдбэриеэ наймаада табина. Сагаан ба хара хилээмэн, булочканууд, пирожки, рогалигууд, печени, пряник, пиццэ г.м. хэдэн янзын талханай хоол худалдан абагшадта дурадхана.
Дэлгэрэнгыгээр 46-дахи дугаарта
