● «Агын Буряадай тойрог: түүхэ мүнөө үе болон хүгжэлтын шэглэлнүүд»

гэһэн эрдэмэй-практическа конференциһээ тэмдэглэлнүүд

 

Агын Буряадай тойрогой байгуулагдаһаар 80 жэлэй ойдо зорюулагдаһан үйлэ хэрэгүүдэй хэмжээндэ «Агинский Бурятский округ: история, современность и векторы развития» гэһэн эрдэмэй практическа конференци Ага тосхондо ноябриин 17-до эмхидхэгдээ. Конференциин ажаябуулгада бүхыдѳѳ 620 гаран хүн хабаадаһан байна.

 

Ц.Дамдинай (зүүн гарһаа), Б.Доржиев, М.Лига, С.Доржиев пленарна зүблѳѳндэ.

 

ЭРДЭМТЭДЭЙ АЖАЛНУУД СОГСОЛОГДОНО

Конференциин дүнгүүд тухай тобшо элидхэл тойрогой Захиргаанай хүтэлбэрилэгшын орлогшо – социальна һалбариин хүтэлбэриин дарга, географиин эрдэмүүдэй кандидат Билигма Батордоржиевна Будаева пленарна зүблѳѳн дээрэ хэһэн байна.

Тэрэнэй тэмдэглэһээр, бүхыдѳѳ 164 элидхэл хэхэ мэдүүлгэ ороһон байгаа, зүгѳѳр конференциин хэмжээндэ 72 элидхэл шагнагдаа. Бүхыдөө эрдэмэй элдэб шэглэгээр 9 докторнууд, 35 кандидадууд, тэрэ тоодо Монгол оронһоо, Буряад Уласһаа, Шэтэһээ бууһан айлшад хабаадаа. Докторнуудай 3-иинь Агын тойрогһоо уг гарбалтай байба: социологиин эрдэмүүдэй доктор Марина Борисовна Лига, гүн ухаанай эрдэмүүдэй доктор Лыгжима Жигжитжаповна Халоупкова, психологиин эрдэмүүдэй доктор Соёлма Батомункуевна Дагбаева.

 

Могойтын 1-дэхи дунда һургуулиин эдир рационализаторнуудай бүтээһэн рободууд.

 

Конференциин хэмжээндэ хоёр үзэсхэлэн дэлгээгдэһэн байна – нэгэниинь «Агинский Бурятский округ – 80 исторических лет. Стандарты, новации, стартапы», хоёрдохинь Агаһаа уг гарбалтай эрдэмтэдтэ зорюулагдаа. Тойрогой 80 жэлэй ойдо зорюулагдаһан түгэсхэлэй ехэ хэмжээ ябуулга болоһон энэ эрдэмэй-практическа конференци угтуулан, тойрогой Захиргаан болон Агын социальна һалбариин хүдэлмэрилэгшэдэй мэргэжэл дээшэлүүлгын институт «Учёные Аги в мире научных открытий» гэһэн мэдээсэлэй суглуулбари хэблээ юм. Тойрогой һуралсалай музейн директор Д.Д.Дашицыренова энэ ажал ябуулгада хам оролсоо. Тойрогой 80 жэлэй түүхэдэ экономикын ба политикын, эрдэмэй ба һуралсалай, соёлой ба элүүрые хамгаалгын, үйлэдбэриин ба хүдѳѳ ажахын хүгжэлтэдэ хубитаяа оруулһан зон олон. Гансахан Агын түүхэдэ бэшэ, бүхыдѳѳ эрдэмэй хүгжэлтэдэ хубитаяа оруулһан зоной даамай ехэ ажалай гэршэ хадаа тэдэнэй эрдэмэй докторой гү, али кандидадай нэрэ зэргэ. Энэ мэдээсэлэй суглуулбари соо тойрогһоо уг гарбалтай эрдэмтэдэй нэрэ обогууд, тэдэнэй эрдэмтэ шэнжэлэлгэнүүдэй сэдэбүүд, эрдэмтэ ажалаа хамгаалһан газарайнь, һургуулиинь нэрэ үгтѳѳ. Тиигэжэ бүхыдѳѳ 297 эрдэмэй кандидадууд, 58 эрдэмэй докторнууд тухай мэдээсэл согсологдоһон байна. Пленарна зүблѳѳнэй түгэсхэлдэ географиин эрдэмүүдэй кандидат Шираб-Нимбу Дашидондоков тойрогой музейн гү, али ИУУ-гай дэргэдэ эрдэмтэдэй зүблэл байгуулха тухай дурадхал оруулаа бэлэй. Энэ дурадхалынь бэелүүлэгдэжэ, саашадаашье ажал үргэлжэлхэ. Нютагайнгаа эрдэмтэдэй ажалнуудые согсолбори, шэнжэлэлгэ энээгээр дүүрээгүй, дутуу дундануудынь үшѳѳ хүсэлдүүлэгдэхэ бэзэ гэжэ найдая.

 

Дэлгэрэнгыгээр 47-дохи дугаарта

You have no rights to post comments