Агын дасанай филиал болохо Тариин дуган Ононой аймагта оршодог юм.
Агын дасанай филиал болохо Тариин дуган Ононой аймагта оршодог юм.
Анхан Онон голой урда хажууда дасан баридаггүй байһан. Улаан-Баатар хотын буддын шажанай дээ-дэ һургуули түгэсхэһэн сагаангууд угай Нимаев Түмэн ламын үүсхэл оролдолгоор 2010 оной октябриин 10-да Новая Заря һууринда буддын шажанай дуганай барилга эхилээ һэн. Барилгын хүдэлмэринүүд жэл арба һарын туршада үргэлжэлһэн байна. Шэнэ дуганай тобойн бодоходонь, 2012 оной августын 23-да Россиин Буддын шажанай заншалта Сангхын бандида хамба лама Дамба Аюшеев түрүүтэй Буряад ороной ба Забайкалиин хизаарай дасан дугангуудай шэрээтэнэр ба лама санаартан Тари нютаг ерэжэ, ехэ уншалга, рамнайн үргэл бүтээгээ бшуу. Иигэжэ Забайкалиин урда талын Онон гол шадархи арад түмэн буддын шажанай түрүүшын дугантай боложо, Ононой, Бооржын ба бэшэшье хүршэ аймагуудай ажаһуугшад, һүзэгшэд Бурхан багша, сахюусадта зальбаржа, гороо хэжэ, буян хуряадаг болонхой. 2013 оной Сагаан һара Һама сахюусанай хуралаар эхилһэн, Дүгжүүбэ, Жэнсрэгэй уншалганууд болоһон, 2014 ондо Арьяа-Баала бурханда мандала үргэгдэһэн байна.
2017 ондо Тариин дуганай байгуулагдаһаар табан жэлэй ойн баяр үргэнөөр тэмдэглэгдээ һэн. Тэрэл үдэр үглөөнэй юһэн сагта Онон голой урда эрьедэ «Звёздный» гэһэн үхибүүдэй элүүржүүлгын лагериин хажуудахи «Байсын Толгой» гэһэн үндэр газарта олоной хүсөөр баригдаһан, ажана амгалан байдалай «Намжил Шодон» субаргын рамнай үргэгдөө. Энэ буянта хэрэг Забайкалиин хизаараар дид хамба Дондукбаев Цырен ламхай түрүүтэй лама санаартанай уншалгаар бүтээгдэжэ, һүүлээрнь Тариин дуганай газаа сог жабхаланта ёһолол боложо, шажанай эдэбхитэд, эрын гурбан нааданай илагшад шагнагдаһан, талаан бэлигтэн концерт-наадаяа бэлэглэһэн байна.
