Агын Буряадай тойрогой Түлөөлэгшэдэй суглаанай ээлжээтэ зүблөөн мартын 30-да үнгэргэгдэбэ. Зүблөөнэй хүдэлмэридэ хизаарай Хуули байгуулгын суглаанай түрүүлэгшэ Игорь Лиханов хабаадалсаһан байна.
Түлөөлэгшэд Т.Иванова (зүүн гарһаа), Б.Тудупов, Баир ламхай.
Соёл хүгжөөлгэ хэлэнтэй холбоотой
Түлөөлэгшэдэй суглаанай түрүүлэгшэ Цырен Цыреновэй болон тэрэнэй орлогшо Даши Дугаровай хүтэлэн ябуулһан зүблөөн дээрэ табан шухаг асуудал харагдаа.
Эгээл түрүүн «Үбэр Байгалай хизаарай буряад соёл хүгжөөлгын түб» гэһэн соёлой гүрэнэй эмхиин ажаябуулга тухай асуудал зүбшэгдэһэн байна. Түбэй директор Сэсэг Норполовагай мэдээсэһээр, буряад соёл хүгжөөлгын түб заншалта болоһон олон тоото хэмжээ ябуулгануудые эмхидхэдэг байна: «Золотые россыпи» гэһэн хүүгэдэй эстрадна дуунай хизаарай конкурс, «Хабарай сэсэг» хатарай конкурс, «Театральна хабар», СССР-эй арадай артист Л.Л.Линховоиной нэрэмжэтэ дуушадай уласхоорондын фестиваль-конкурс, арадай уран урлалай бүтээлнүүдэй үзэсхэлэнгүүд г.м. Нёдондо «Элинсэгэйм алтан шүрбэһэн», «Солнечный олень» гэһэн үндэһэн хубсаһанай харалга-мүрысөөнүүдэй эмхидхэгдэһые һананабди. Тиихэдэл зэргэ буряад соёл хүгжөөлгын түбэй байгуулагдаһаар 50 жэлэй ойн баяр тэмдэглэгдээ бэлэй: энэ эмхи тусгаар баян түүхэтэй, анха түрүүн Агын тойрогой Арадай урлалай байшан гээд 1967 ондо байгуулагдаһан юм.
Сэсэг Жугдуровнагай элидхэһээр, шиидхэхээр асуудалнууд олон, тэрэ тоодо ажалай 6 һууринь компьютераар хангагдаадүй. Энэ асуудал хараха арга боломжо бэдэрхэ тухай дурадхал хизаарай соёлой министерствэдэ болон эд зөөриин департаментда оруулха шиидхэбэри түлөөлэгшэд абаба.
Олонхинь мэргэжэлгүй
Тойрогой ажаһуугшадые ажалаар хангалгын түбүүд нютагаа өөһэдөө хүтэлхы зургаануудтай, тойрогой захиргаантай болон хүдөө ажахын, экономикын бэшэшье һалбаринуудай ажалаар хангагшадтай тон нягта харилсаатайгаар хүдэлдэг юм гээд, ажаһуугшадые ажалаар хангалгын хизаарай түбэй директор Инна Шестакова мэдээсэбэ. Иимэ үрэ дүнтэй ажаябуулгань гол түлэб муниципальна тусхай зорилготой программануудай хэмжээндэ ябуулагдадаг байна. Эдэ программануудые бэелүүлгын ашаар 89 хүн ниитэ ажалда хабаадуулагдаһан, ажалгүй 39 хүн саг зуурын ажалтай болоһон, 436 үхибүүд саг зуурын ажалаар хангагдаһан байна.
Хүндүүлхэй асуудалнуудай нэгэн гэхэдэ, ажалгүй зоной диилэнхи хубинь ямаршье мэргэжэлгүй байдаг. Мэргэжэлгүй зониие ажалтай болгохонь бүришье хэсүү ха юм. Жэшээнь, Дулдаргын аймагта ажалгүй гэжэ бүридхэлдэ абтаһан эрхэтэдэй 70 хубинь мэргэжэлгүй байба. Тиимэһээ ажалаар хангалгын ажаябуулгын үшөө нэгэ шэглэл хадаа мэргэжэл олгуулга болоно.
Үншэн үхибүүд гэргүй үлөө
Удаань үншэн үхибүүдые болон гэртэхинэй тэдхэмжэгүй үлэһэн хүүгэдые гэр байраар хангалгын асуудал харалгада олон тоото зүрилдөөтэ асуудалнууд бодхоогдоһон байна. Иимэ үхибүүдтэ гэр байра барилга хизаарай территориальна хүгжэлтын министерство эмхидхэдэг байна. Энэл министерствэдэ хабаатай «Служба единого заказчика» гэһэн эмхи барилгын асуудалнуудые шиидхэдэг.
2017 ондо министерство үншэн хүүгэдтэ 412 гэр байра бариха, али худалдан абаха гэжэ түсэблэһэн юм гээд хизаарай территориальна хүгжэлтын министрэй орлогшо Александр Иткин элидхэбэ. Зүгөөр бодото дээрээ оройдоол 182 гэр байра, тэрэ тоодо 10 гэр Агада ашаглагдаһан байна. Могойто тосхондо ажалайнгаа сэн 17 хубяар унагаажа, конкурс шүүһэн подрядчик нёдондо ноябриин 30 болотор табан хоёр квартирна гэр ашаглалгада тушааха аад, бодото дээрээ оройдоол гурбан гэрэй һуури табижал шадаа. Дулдаргада бодхоогдожо эхилһэн 12 гэр тушаагдаадүй, подрядчигынь саг соогоо хэлсээнэй ёһоор ажалаа хээгүй. Иигэжэ болзор соогоо ашаглалгада тушаагдаагүй гэрнүүдтэ һомологдоһон мүнгэн һөөргөө федеральна бюджет руу бусаагдана бшуу. Тиимэһээ гүрэнэй засаг зургаануудай талаһаа энэ асуудал шиидхэхэ замууд тодорхойлогдоогүй байна гэжэ түлөөлэгшэд тэмдэглэбэ.
Дэлгэрэнгыгээр 14-дэхи дугаарта.
Энэ хаягаар электронно захил хэхэ аргатайт Адрес электронной почты защищен от спам-ботов. Для просмотра адреса в вашем браузере должен быть включен Javascript.
