Эндэ һая К.Базарсадаевай нэрэмжэтэ Агын искусствын һургуули соо хүүгэдэй дунда тойрогой «Талын аялганууд» гэһэн фестиваль 2-дохёо эмхидхэгдээ юм.
С. Рыгзыновада бэлэг барюулагдана. Т.Болотов. Д.Куликова.
Энэ хэмжээ ябуулгада хабаадагшадай дуу гүйсэдхэлгые Забайкалиин хизаарай соёлой габьяата хүдэлмэрилэгшэ, «ДалиТЭ» театрай артист Доржо Болотов, Агын Буряадай автономито тойрогой соёлой габьяата хүдэлмэрилэгшэ, буряад соёл хүгжѳѳлгын түбэй методист Марина Будажапова, «ДалиТЭ» театрай артистка Бальжима Цыбенова, Агын соёлой байшанай методист Зоригто Цыбиков гэгшэд сэгнэһэн байна. Үдэрэй туршада 50-яад хүүгэдэй дуулахые анхаралтайгаар шагнажа, дүн гаргахань жюриин гэшүүдтэ бэлэн бэшэ байгаа ёһотой. Ургажа ябаа хүүгэд түрэл хэлэн дээрээ буряад дуунуудые зэдэлүүлжэ, харагшадай һайшаалда хүртэжэ байгаа юм. Тайзан дээрэһээ «Табан хурган» (үгэнь - Г.Чимитовэй, хүгжэмынь Г.Жалсановагай), «Баяртайб» (үгэнь - Ц-Х.Дарибазаровай, хүгжэмынь - С.Жалсановай), «Эхэ хэлэмни» (үгэнь - С.Тумуровагай, хүгжэмынь Б.Дамдинжаповай) гэхэ мэтэ аялгаар һайхан дуунууд зэдэлээ.
Сахюуртын «Чебурашка» сэсэрлигэй хүмүүжэмэл Дарья Куликова, 3-4-дэхи ангинуудай һурагшадай хоорондо Гүнэй нютагай Виктор Якимов, Агын 2-дохи дунда һургуулиин Лилия Чернинова гэгшэд уһан буряад хэлэн дээрэ «Бүмбэгэмни», «Бээлэй» гэхэ мэтэ дуунуудые дуулажа, харагшадта ехэтэ һайшаагдаа. Харин жюриин эрхим сэгнэлтэдэ хүртэһэн хабаадагшад: сэсэрлигүүдэй хүмүүжэмэлнүүдэй хоорондо - Зүдхэлиин «Родничок» сэсэрлигэй Саран Митупова «Мүнгэн тобшо», Уртын «Һолонго» сэсэрлигэй Ирина Шоглино «Наран сэсэг»; 1-2-дохи ангинуудай һурагшадай хоорондо - Сагаан-Шулуутайн Баярма Пурбуева «Аха дүү хоёр», 3-4- дэхи ангинуудай һурагшадай хоорондо - Агын 1-дэхи дунда һургуулиин Аригуун Чимитова «Хүлеэлгэ», Дулдаргын 2-дохи дунда һургуулиин Светлана Рыгзынова «Эхэ хэлэмнай» гэжэ дуунуудые хүгжэм соонь, нотоһоонь алдахуулангүй дуулажа шадаа. Хүүгэдые шагнажа байхада, ехэл һонин, саашадаа иимэл хэмжээ ябуулгануудые хүгжѳѳбэл, ургажа ябаа хүүгэдэй буряад дуунуудтаа һурахадань түлхисэ болохо һэн ха.
Дэлгэрэнгыгээр 45-дахи дугаарта.
