Агын соёлой байшан соо ехэ хүлгѳѳтэй... Ушарынь юуб гэхэдэ, «Таладаа тааруухан буряад гутални зохид даа» гэһэн тойрогой фестиваль хүүгэдэй дунда эмхидхэгдээ юм.
Фестивалиин жюриин гэшүүдээр Агын аймагай соёлой байшанай директор Цыржимыдык Ванданова, эмхидхэлэй-методическа таһагые даагша Сэсэгма Жамбалова, уран һайханай таһагые даагша Туяна Дондокова, методист Зоригто Цыбиков болон багшын ажалай ветеран Валентина Лыгдынова гэгшэд ажаллаа. Хэмжээ ябуулгын урда тээ үндэһэн хубсаһаяа үмдэнхэй хүбүүд, басагад дуугаа дуулалдажа, конкурсдо бэлдэнэд. Мүрысѳѳнэй зорилго хадаа хүүгэдэй угсаатанайнгаа үмдэдэг гутал болон аман зохёол тухай мэдэсыень үргэдхэлгэ болоно бшуу. Эндэ дүн хамта 7 команда буряад гутал тухай мэдэсээрээ хаба шадалаа үзэлсэхэеэ ерээ. Фестивалиин эхиндэ Валентина Лыгдынова буряад гуталай удха ба янза тухай харагшадта хѳѳрэжэ үгѳѳ. Удаань «Таладаа тааруухан буряад гутални» гэһэн түрүүшын шатада 7 минутын туршада хүүгэд наадаяа харуулаа. Эгээл шадамар бэрхэ байһанаа Согто-Хангилай хүүгэдэй уран һайханай һургуулиин «Тэршээхэн унаган» (хүтэлбэрилэгшэнь - Цымжидма Цырендашиева) ба Амидхааша нютагай «Улаалзай» (хүтэлбэрилэгшэнь – Сэсэгма Чернинова) бүлгэмүүдэй гэшүүд харуулжа шадаа. «Тэршээхэн унаган» бүлгэмэйхид эрмэгтэй гутал үмдэнхэй, халюун булган малгайтай, хүхэ торгон дэгэлтэй тайзан дээрэ гаража, нэрэ обогоо хэлэжэ, бэе бэетэеэ танилсуулна. Тиихэдээ мэдээжэ уран зохёолой геройнууд: «Тархайн хүбүүн - Зархай», «Тахуунай», «Будамшуу» гэхэ мэтэ арадаймнай түлѳѳлэгшэд бодото дээрээ бодоһон шэнги байба.
Дэлгэрэнгыгээр 45-дахи дугаарта.
