- Жамсаран Викторович, мүнөөдэрэй байдалаар, хэды ажаһуугшадтайбта?
- Хила нютагнай 6 багахан һууринһаа бүридэдэг: Ара-Булаг, 71-дэхи разъезд, Ага станци, Хүрэлжэ, Булаг, Остречная. Хамта 1600 гаран ажаһуугшадтай. Анхан үшөө олон зотой һэмди, сэрэгшэд бүридхэлдэ ородог һэн, частьнуудай һандархада, зөөжэ ошоһон. 71-дэхи разъезддэ түмэр харгын ажалшад, Ара-Булагта наһанайнгаа амаралтада гараһан сэрэгшэд гэр бүлөөрөө ажаһуудаг. Тэндэ сэрэгэй гарнизон байһан, 10 гаран жэлэй саана һандарһан. Олонхиинь зөөжэ ошоһоншье һаань, зариман үлэжэ, тэндээ ажал хэдэг. Хүрэлжэдэ зуу гаран хүн ажаһуудаг, диилэнхинь малшад болоно. Хүрэлжэ тойроод малшадай 12 бууса бии. Бага нютагуудаар старостанууд ажал ябуулдаг. Хамтадаа 690 үрхэтэ айл тоологдоно, ажаһуугшад 2165 толгой эбэртэ бодо мал, 2169 хони, 401 гахай, 139 ямаа, 201 адууһа үсхэбэрилнэ. Нютагтамнай дунда һургуули, хүүгэдэй сэсэрлиг, почто, Могойтын совхоз, мяха болбосоруулдаг комбинат ажалаа ябуулдаг. Дунда һургуулида 173 һурагшад һурана, тойрогой хүдөөгэй һургуулинуудай дунда эгээл олон һурагшадтай юм. Хүүгэдэй сэсэрлигтэ 75 багашуул ябадаг, 2015 ондо һаял толгойлогшо болоод байхадамни, саадай шэнэ байшан баригдажа, ашаглалгада тушаагдаа һэн. Соёлой байшан бии, иишээ Могойто тосхоной соёлой ажалтад ерэжэ, концерт-нааданда бэлдүүлдэг. Хүрэлжэдэ эмнэлгын амбулатори ба амбулатори дотор үдэрэй стационар хүдэлдэг. Тиишээ үбшэнтэд ябажа, арга абадаг. «Земский врач» гэһэн гүрэнэй программын үндэһөөр, залуу эмшэд хүдэлхэеэ ерэһэн аад, удаан болонгүй ябашоо. Аймагай түбһөө, харгыһаа холо байхадань, залуу мэргэжэлтэд хүдэлжэ байһан газартаа удаан үлэнэгүй бшуу. Хүдөөгэй врачебнэ амбулаторидомнай эмшэд, эмнэлгын сестранууд хэрэгтэй. Шуһа шэнжэлдэг лаборатори, физиокабинет хүдэлдэг юм. Россиин юрэнхылэгшын гаргаһан майн зарлигай ёһоор, 100-һаа олон ажаһуугшадтай хүдөө һуурингуудта хүдөөгэй амбулаторинууд баригдаха ёһотой. Бага һуурингуудта эмнэлгын булан байгуулха асуудалаар хизаарай энхэ элүүр сахилгын яаманай сайд Сергей Давыдовтай зүбшэжэ байһамнай, тэрэ хүмнай ажалһаа болишоо. Энэ ажал саашань ябуулжа, заабол бүтэхэ байха гэжэ найданаб. Залуу һүрэгтэн ажал хүдэлмэри бэдэржэ, хизаарһаа гадуур сэрэгэй албанда контрактаар гү, али вахтаар ябадаг. Жэшээлхэдэ, манай бага хүбүүн Эрхүүһээ хойшо оршодог аймаг руу вахтада ажалда оронхой.
   - Хүдөө һуурингуудаартнай ажаһуудаг зон танда ямар асуудалтайгаар хандадаг бэ?
   - 2015 ондо толгойлогшоор һунгагдаад, ажаһуугшадайнгаа хүндүүлхэй асуудалнуудта гол анхаралаа хандуулжа, ажал ябуулжа эхилээб. Манай 6 һууринай табаниинь түмэр харгын станцинууд болодог. Тэндэ ажаһуудаг зон үнгэрэгшэ зуун жэлэй эхеэр баригдаһан гэр байра соо ажаһууна. Гэрнүүд хуу үмхиржэ, унахаа байһан. Б.Ельцинэй гүрэнэй юрэнхылэгшэ ябахада абтаһан зарлигай ёһоор, түмэр харгыда ажалладаг зоной гэр байра муниципалитедүүд заһабарилха ёһотой ха. Хоёр жэлэй хугасаа соо гэр байрануудай дансануудые бэлдэжэ, мэргэжэлтэдые асаруулжа харуулаад, зүбшөөл абаад, Шэтэ руу тушаагаа һэмди. Хизаарай территори хүгжөөлгын яаман дэмжэлтэ үгэжэ, дансада оруулагдаа. Тэрэ дансын бүтээ һаа, мүнгэн һомологдожо, шэнэ гэрнүүд баригдаха байха гэжэ найданабди. Ага станци дээрэ тон һүүлэй үедэ баригдаһан томо объект гэхэдэ, хүүгэдэй сэсэрлиг байна. Могойтын аймагай захиргаанай хүтэлбэрилэгшын «хүүгэдэй хуушан байшан нэгэ юумэн болгожо хэрэгсээгыт» гэхэдэнь, нютагай захиргаанай гуламта болгохо гэжэ шиидээд, досоо талаһаань заһабарилга хэжэ шэрдээд, сагаадаад, үнгэрэгшэ үбэлэй декабрь һарада зөөжэ орообди. Баруун хажууень почтодо үгөөбди, тэдэ олон жэлдэ өөрын мэдэлэй байшангүй байгаа. Зүүн хажууень участково полицида дамжуулаабди. Байшанай диилэнхи талмайень захиргаан эзэлээ. Анхан энэ байшан ажахын тэжээлэй цех байһан. Һүүлдэ сэсэрлиг болгогдожо, арбан жэлдэ багашуулые угтан абадаг байгаа бшуу. Тиихэдэ анхан РайПО-гой мэдэлэй байһан сагаан гэр захиргаанда дамжуулагдажа, унаа табидаг байшан болгогдоо һэн. Тэндэ захиргаанай унаанууд табигдадаг, нүгөө гараж соо ЛТЗ трактор оруулагданхай. Үбэлдөө ба зундаашье трактораар ажаһуугшадтаа уһа шэрэжэ буулгадагбди.

You have no rights to post comments