Тоо бодолгын, ород, буряад, хари хэлэнүүдтэ, тамирай болон бусад хэшээлнүүдтэ ходол эрхим сэгнэлтэ абадаг, хатарха, дуулаха болон хубсаһа оёхо бэлиг шадабаритай юм. Багадаа хүбүүдтэй хамта барилдаанда ябаадшье үзэһэн ха. Эхин шатын ангиин һурагша ябахадань, аба эжынь хатарай кружогто ябуулаа. Багаһаа уян нугархай, түрэл арадайнгаа ёохор хатар бэрхээр гүйсэдхэдэг шуу. Суг һурадаг хүбүүд басагадтаяа хатар наада табидаг. Нэрлэбэл, Соёл Хорёнов, Намжилма Бадмажапова, Баир Цыбенов, Дондок Бальжинимаев, Цындыма Балданова, Вероника Гайнуллина гэгшэдтэй һургуулидаа хатардаг гээшэ. Хатар харуулжа, холын нютагуудаар ябаһаншье байна.
   Мүнөө 9-дэхи ангиин болоходоо, номоо үзэжэ, удаан һуудаг болоо. Ушар гэхэдэ, һуралсалай түгэсэхэдэ, Зоригма үетэнөөрөө гүрэнэй шалгалта (ОГЭ) бариха юм. Эгээл дуратай түүхэ, обществоведени, МХК, хари хэлэ гүнзэгыгөөр шудалдаг. «Намда хари хэлэ мэдэхэ шухала байна, ерээдүй сагта хари гүрэндэ ажалтайшье боложо магадби. Тоо бодолгодо ядадагшьегүй һаа, гуманитарна шэглэл намда тааруу», - гэжэ Зоригма энеэн хөөрэнэ. Зоригмагай аха Дабацырен Жамьянов һургуулиин шаби ябахадаа, эдэбхитэн, шуран, солбон хүбүүн ябаа. «Лидер 21 века» тойрогой конкурсдо хабаадажа, гран-прида хүртэжэ, Бүхэроссиин «Океан» лагерьта амарха путёвкоор шагнагдаһан байха юм. Зоригма ахаһаа жэшээ абажа, алишье талаар урагшаа эрмэлзэлтэй ябадаг шуу. Тэрэ һуралсалһаа гадна гүрэнэй һурагшадай хүдэлөөнэй эдэбхитэй гэшүүн. Энэ жэлдэ волонтёрнуудай акцинуудта нилээн хабаадаа. Зоригмагай аба Зоригто Бальжинимаевай тайлбарилһаар, басаганиинь һургуулияа эрхимээр дүүргэхэ зорилго табинхай. Багадаа: «Томо болоходоо, хэн болохобши?» - гэхэдэнь «хатарай багша гү, али артист болохоб», - гэдэг байһан.
   Мүнөө байдалай эрхээр хүүгэд элдэб мэргэжэл шэлэдэг болоһон. Хэншье болоо һаа, һургуулиин наһандаа эрдэм шудалха, амжалта туйлаха гэһэн эрмэлзэл урдаа табиһан залуу хүнэй хэзээдэшье урагшатай ябахань лабтай.

You have no rights to post comments