Агын Буряадай автономито тойрогой Шэтын можотой ниилэхэдэ, Агын аймагай хүдөөгэй номой сангуудые нэгэдүүлхэ зорилготойгоор 2009 оной январиин 1-дэ аймагай түбэй номой сан (ЦБС) байгуулагдаһан түүхэтэй. Энэ номойсангые урагшатай hайнаар ударидажа ябаhан, «Забайкалиин хизаарай габьяата гүрэнэй алба хаагша» гэhэн нэрэ зэргэтэй Дарима Цэдашиеватай уулзажа, 2016 оной ажалайнь дүнгүүдээр хөөрэлдөө эмхидхэhэн байнабди.
Агын аймагай номой сангуудай ажалтада Д.Цэдашиева (зүүн талаһаа) 4-дэхи зогсоно.
- Дарима Батомункуевна, Агын аймагай түбэй номой санда хэды хүн хүдэлдэг бэ?
- Б-Б.Намсараевай нэрэмжэтэ аймагай түбэй номой санда 7 хүн ажалладаг. Тэдэнэй 4-иинь дээдэ эрдэмтэй мэргэжэлтэд юм. Нэрлэбэл, методист Ринчин-Ханда Цынгуева хамаг түсэб, сценари, тоосоо бүридхэдэг, справочно-библиографическа таhагые даагша Сэсэгма Дорюнова дүй дүршэл һайтай ажалтан, номой сан хүсэлдүүлгын таhагые даагша Дарима Баторова профсоюзай эхин эмхиин ажал ударидадаг, номоор хангалгын танхимда Жаргалма Дашиева оролдосотойгоор хүдэлдэг. Шухала зорилгомнай гэхэдэ, номой сангай хүдөөгэй 17 филиалда методическа туhаламжа үзүүлхэ, нэгэдүүлжэ хүтэлбэрилхэ үүргэтэйбди. Аймагай бүхы номой сангуудта дүн хамта 24 мэргэжэлтэд ажаллана.
- 2016 оной ажалайтнай дүнгүүд ямаршуу гээшэб?
- Yнгэрhэн жэлдэ олон шэглэлээр ажал ябуулагдажа, түсэбүүд дүүргэгдээ. Ага тосхондо оршодог манай номой сангай жасада 6000 гаран экземпляр ном тоологдоно. «Подари книгу библиотеке» акци ябуулдагбди. Хүдөөгэй номой сангууд интернедтэ холбуулагдана. Буряад хэлэнэй hарын хэмжээндэ үхибүүдтэ буряад мультфильмуудые харуулаабди, «Сэдьхэлэй хүбшэргэй» гэhэн уран шүлэгшэдэй нэгэдэлэй гэшүүдтэй уулзалганууд, буряад шүлэгэй конкурснууд үнгэргэгдөө. Гүрэнэй зүгhөө 9800 түхэриг субсиди үгтэжэ, нютаг ороноо шэнжэлэлгын шэглэлэй номууд абтаа. Зүгтөө урдын һунгамал зохёолой (классика) номууд үсөөн. Номой санда уншагшад таһалгаряагүй ябана, ном уншадаггүй хүн гэхэдэ, тон хомор байдаг. Россиин Киногой жэлдэ «Война против разума и души», «Волшебный мир детского кино», «Живёт село родное», «Музыка кино» гэhэн хэмжээ ябуулгануудые эмхидхээбди, Эсэгын дайнай үе харуулhан совет фильмүүдэй үндэhөөр зүжэглэмэл наада хүдөөгэй номой сангайхид талаан бэлигтэйгээр харуулаа, кино тухай номой үзэсхэлэнгүүд дэлгээгдээ. Росси гүрэнэй түүхэ бэшэhэн, элитэ гэгээрүүлэгшэ Н.Карамзинай түрэhөөр 250 жэлдэ Россида «Карамзинай жэл» гэжэ соносхогдоо бэлэй. «Семь заслуг Карамзина» буктрейлернүүд, «Наш Карамзин» гэһэн эссегэй конкурс гэхэ мэтэ үнгэргэгдөө. Номой сангайхид Ножын нуур шадархи үзэсхэлэнтэ газарнуудаар ябаа һэмди. Тэндэ Согто-Хангилай музейн директор Дарима Батоева түрэл нютагайнгаа түүхэ домог хөөрэжэ үгөө hэн. «Буряад поэзи» шэглэлээр ажал ябуулдагбди. Агын тойрогой уран шүлэгшэдые бэлдэжэ, бүгэдэ буряадай «Алтаргана» фестивальда хабаадаабди.
Дэлгэрэнгыгээр 3-дахи дугаарта.
