Намарай дулаахан үдэр, октябриин 7-до Гүнэй hууринай номой сан-филиал соо ехэ hонирхолтой хэмжээ ябуулга үнгэргэгдэбэ.

«Молодая гвардия» фильмһээ хэһэг гүнэйнхид харуулна.

Гүрэнэй дээдын захиргаанай шиидхэбэреэр, 2016 он – Киногой жэл гээд соносхогдоһон гээшэ. Тиимэhээ Киногой жэлдэ зорюулжа, Агын аймагай Б-Б. Намсараевай нэрэмжэтэ номой сан соёлой эмхинүүдтэй суг «Кино: многоликое и неисчерпаемое» гэһэн түһѳѳ түсэб бэелүүлнэ. Энэ түһѳѳ түсэбэй ёһоор, аймагай номой сангууд-филиалнууд хэдэн шатаар хэмжээ ябуулгануудые үнгэргэхэ юм.

Эгээл түрүүн Ононой эрьеэр түбхинэһэн нютагайхид хамтаран сугларжа, ажаябуулга эмхидхэбэ. Тиигэжэ Гүнэйн, Будаланай, Хүнхэрэй болон Һүдэнтын номой сангууд-филиалнууд “Война против разума и души (о войне)” гэһэн хэмжээ ябуулга Гүнэйн номой сан соо ёһотойл һайндэрэй оршондо эмхидхээ.

Һайндэрэй эхиндэ Гүнэйн соёлой байшанай мэргэжэлтэд ородой мэдээжэ уран зохёолшо А.Фадеевэй романаар табигдаһан «Молодая гвардия» кинофильмын удхаар зүжэглэмэл наада харуулаа. Тиихэдэ хэмжээ ябуулгые дуу хүгжэм, хатар шэмэглээ. Будалан болон Хүнхэр нютагуудай библиотекарьнүүд - Баирма Цыденжапова ба Баира Дугарова хоёр нютагуудайнгаа соёлшодтой суг Б.Васильевай номой удхаар “А зори здесь тихие...” фильмһээ хэһэгүүдые зүжэглэн харуулһан байна.

Дайнай үеын үйлэнүүд харагшадай зүрхэ сэдьхэл нилээн хүдэлгѳѳ, олон хүн уһатаһан нюдѳѳ аршан байгаа бэлэй. Һайн дуранай артистнарай тайзан дээрэхи наада сугларагшад дулааханаар угтаа, илангаяа Будаланай соёлой байшанай директор Бато Шагдаровай «А зори здесь тихие...» фильмын гол герой болохо старшина Ф.Васковой дүрэ үнэншэмэ һайнаар наадалгань хадуугдаа ёһотой. Бодото артистнарһаа дутуугүй, шадамараар молодогвардейцүүдэй дүрэнүүдые Гүнэйн дунда һургуулиин һурагшад гүйсэдхѳѳ, хүбүүгээ алдаһан эхын монолог Гүнэйн социально-соёлой түбэй уран һайханай хүтэлбэрилэгшэ Зинаида Базаржаповна Батоцыренова уншажа, харагшадые уяруулаа. Һайндэрэй түгэсхэлдэ нютагай аман зохёолой “Алтан булаг” бүлгэмэй гэшүүд - Галина Долгорова, Намсалма Дугарова, Жымбылма Дамбаева, Цырен-Ханда Ринчинова гэгшэд һайн дуранай гармонист Юрий Ивановой үдэшэлгэ доро “Катюша” дуу хужарлама гоёор гүйсэдхѳѳ. Тиихэдэ нютагайнгаа ажахын түрүүлэгшэ Цыден Цырендашиевта баярые хүргэнэбди. Цыден Батомункуевич нютагтамнай болоhон найр нааданда, элдэб янзын хэмжээ ябуулгануудта ходол туhа хүргэдэг зантай.

 

 

Дэлгэрэнгыгээр 42-дэхи дугаарта.

You have no rights to post comments