Хизаарай Цыбен Жамцараногой нэрэмжэтэ номой сангай мэргэжэлтэд мэдээжэ поэтессэ, Россиин Федерациин Уран зохёолшодой холбооной гэшүүн Дугарма Батоболотоватай уулзалга эмхидхэһэн байна.
Номой сан руу ороходо, аалин шэмээгүй байдал, шэдитэ үльгэр онтохонуудай орон угтадаг гээшэ. Харин мүнѳѳ номой сангай танхимаар дүүрэн хүгжэм зэдэлнэ, һайн дураараа уулзалгада ерэһэн бүдүүн зон болон Агын 1-дэхи дунда һургуулиин 10-дахи ангин һурагшад һууна. Буряад хэлэнэй һарада зорюулагдаһан номуудай ехэ үзэсхэлэн анхарал татана, мүн Дугарма Батоболотовнагай зохёохы ажал харуулһан үзэсхэлэн дэлгээтэй байна. Уулзалгада мэдээжэ поэдүүд - Батор Бадмаевич Шагдаров болон Шуя-Ханда Аюшиевна Базарсадаева хабаадаа. Уулзалга “Хуби заяанайм одон” гэһэн Б.Шагдаров ба Ш-Х. Базарсадаева. гаршаг доро поэтессын зохёохы замтай танилсуулгын маягаар үнгэрѳѳ. Түрүүн хэмжээ ябуулга хүтэлһэн залуу мэргэжэлтэн Цыцыгма Цыриторова сугларагшадые Дугарма Батоболотовагай намтартай танилсуулаа, удаань Агын телевидениин бэлдэһэн видеофильм дурадхагдаа.
Сагаан-Уула нютагта тоонтотой, дүшѳѳд жэлэй туршада Сахюуртын дунда һургуулида багшалһан Дугарма Батоболотовна наһанайнгаа амаралтада гарабашье, гуурһаяа орхёогүй, уянгата уран шүлэгүүдээ зохёоһоор зандаа.
Наһалха сагтамнай
Нангинаар үргэхэ,
Найдамтай тулгамнай -
Наартайхан хүүгэднай.
Жаргалтай наһанай
Жэгүүрхэн далинууд
Басагад хүбүүднай -
Баярай һүлдэнүүд...
– гэһэн үгэнүүдтэй “Баярай һүлдэнүүд” шүлэгынь мэдээжэ дуун болонхой. Энэ дууе соёлой мэргэжэлтэн Туяна Дондоковагай, “Алтаргана-2016” нааданай лауреат болоһон “Дурамни хүлеэнэб” дууе залу дуушан Ирина Насановагай гүйсэдхэхэдэ, үхибүүд анхаралтайгаар шагнан һуугаа. Мүнѳѳ эдэ хүүгэд хэн эдэ дуунуудай автор бэ гэжэ тон һайн мэдэхэ болобо ха юм.
Уулзалгын үргэлжэлэлдэ үхибүүд поэтессын зохёоһон, ульгамаар сээжэлдэхээр, гүн удхатай шүлэгүүдые уншаа. Шүлэг лэ сээжэлдэлгэ хүүгэдэй хэлэ баяжуулдаг, олоной урда гараад, үгэ хэлэлгэдэ дүршүүлдэг гээшэ. Дугарма Батоболотовагай “Һаял шэнги” гэһэн шүлэгынь тон хүүгэдтэ зорюулагдаһан бэшэл даа. Зүгѳѳр һурагша М.Доржиева энэ шүлэгэй удхыень гаргажа, уулзалгада сугларагшадай сэдьхэлэй шэмшэртэр уншаа.
“Хуби заяанайм одон” гэһэн 2012 ондо хэблэгдэһэн ном соонь богонихон, сээжэлдэхэдэ бэлэхэн шүлэгүүд олон. Уулзалгын үедэ үхибүүд ээлжэлэн гаража, “Байгаалияа гамная”, “Айлшан үбэл”, “Элдин Агамни”, “Асуудал” г.м. шүлэгүүдыень уншаа. Юрын лэ һурагшад, зариманиинь нэгэ бага акцентэтэйгээршье уншаа. Зүгѳѳр тэдэнэй түрэл хэлэн дээрээ уран мүрнүүдые сээжэлдэжэ, далда удхыень ойлгон үгүүлжэ байһаниинь эгээл сэнтэй.
Дэлгэрэнгыгээр 42-дэхи дугаарта.
