Агын тойрогой «Театрай намар» гэһэн харалга-мүрысөөнэй түрүүшын үдэр, сентябриин 21-дэ Согто-Хангилай, Табтаанайн, Сагаан-Шулуутайн драмын бүлгэмэйхид ба Догойн, Могойтын, Зүдхэлиин арадай театрнуудай артистнар Агын соёлой байшан соо сугларжа, зүжэг наадаяа харуулаа, хүн зоной сэдьхэл зүрхэ хүдэлгөө.
Б-Х. Загдаева (баруун талаһаа), Л. Батоева.
Сугларагшад зүжэг зохёогшодой, арадай уран бэлигтэнэй, алтан намарай хэшэгтэ хүртөө гэхэдэ болоно.
Ушар юуб гэхэдэ, зүжэг найруулан табигшад уран зохёолшо Жамсо Тумуновай болон нютаг зохёолшодой бүтээлнүүдые репертуартаа абажа, бүлгэм бүхэн өөрын маягтай, һайн талануудтай байгаа. Нёдондо жэл Могойтын арадай театрайхид Константин Сергиенкын «Баяртай, жалга» гэһэн пьесэ абьяастайгаар наадажа, ехэ амжалта туйлаа һэн. Энэ удаа Жамсо Тумуновай «Сэсэгмаа» пьесэ найруулан табижа, тэдэнэр дахяад тойрогой конкурсын лауреадууд болоо. Найруулан табигша Бато Цыденовэй шэнэ онол аргануудые хэрэглэхэдэнь, зүжэгэй шэмэглэл, уран һайханиинь үндэрөөр сэгнэгдээ. Агын Буряадай автономито тойрогой соёлой габьяата хүдэлмэрилэгшэ Цырегма Нанзатова, соёлшод – Дарима ба Евгений Базаровтан, Мунко Лхамажапов, Бальжир Дамдинов, Бальжит Гармаева ба бэшэн Тамжад, Сэсэгмаа, Дамба, Мархаашка, Гомбо болон Должод гэхэ мэтэ дүрэнүүдые һайнаар харуулжа шадаа юм.
Зүдхэлиин арадай театр Базарсадо Цыденовэй «Эхын энэрхы сэдьхэл» гэһэн эссе найруулан табяа. Хүтэлбэрилэгшэнь - Россиин соёлой габьяата хүдэлмэрилэгшэ Намсалма Дамдинцыренова иигэжэ хэлээ: «Уг удамайнгаа утаhа таhалжа болохогүй гэhэн удхатай зүжэг соо буряад эхэнэрэй гаталhан хүндэ хүшэр зам харуулна. Энэ дүрын түһөө болоһон хүн гэхэдэ, Һүдэнтэ нютагай, 102 наһа наһалһан Манда хүгшэн болоно. Гол дүрэ гүйсэдхэгшэ Ирина Дашибалова, Доржи Тумуров, Мыдык Жамсоева, Цырен Жалсанов, Амгалан Дашинимаев, эдиршүүл - Цыден Балдангомбоев, Зоригто Дашибалов ба бэшэн хабаадаа».
Сагаан-Шулуутайн драмын бүлгэм Бадмаханда Загдаевагай «Туулмаг орооhон» гэhэн зохёол зүжэг болгон харуулаа. Соёлой байшанай директор Һама Балданова абьяастайгаар наадаа, тон үндэр наһатан, ажалай ветеран, 75 наhатай Дарима Базаржаповае тэмдэглэхээр байна. Мүн Һама Батоева, Сэсэгма Аюрзанаева, Цыренханда Нимаева, Нанзад Эрдынеев, Цыреннамдак Чимитдоржиев гэгшэд дүрэнүүдые шадамараар харуулһан байна. Сагаан-шулуутайнхидта 2016 оной театрай харалгада лауреадай нэрэ зэргэ олгогдоо юм.
Дэлгэрэнгыгээр 44-дэхи дугаарта.
