Айгаагүйбди

Баатарай эгэшэтэеэ гэртээ байтарнь, зайн гал унтаршаба ха. Эжынгээ гэртээ орожо ерэхэдэ, хүбүүн угтан дэбхэрээд:
- Гэрэлэй унтархада, би айгаагүйб. Юундэб гэхэдэ абгаймни хажуудамни байгаа. Абгаймни баһа айгаагүй, юундэб гэхэдэ би хажуудань байгааб. Миисгэймнай баһа айгаагүй, абгайтаяа хоюулан хажуудань байгаабди, - гэбэ ха.

Танайхи ямар бэ?

Январиин янгинама хүйтэн боложо, эхин классай үхибүүд хэдэн үдэр соо һургуулидаа ошонгүй, гэртээ байжа амарбад. Үдэртѳѳ наранай игаахада, бэе бэедээ айлшалалсажа нааданад.
1-дэхи класста һурадаг айлшан Хандажаб һониноо хѳѳрэнэ:
- Һаянай манай радиомнай иимэ һайн! - гээд, арбагархан гарнуудаа ташаан дээрээ табяад: - Танай радио ямар бэ? Баһа һайн гү? - гэжэ мэхэтэйхэнээр асууба.

Великанууд бархирдаг гү?

Бишыхан Базар шүдэндѳѳ арга хүүлээд, эмшэнэй таһалгаһаа аалихан бултайһаар гаража ерэбэ. Уйлаһандаа нюдэнэйнь зубхи улайнхай, доодо уралынь дурбиинхай. Сугтаа ерэлсэһэн эсэгэнь хүбүүгээ аргадаһаар, аалихан хубсалуулаад, хүтэрэлдэһѳѳр гэр тээшээ шэглэбэд. Гэртээ бусажа ябахадаа, ехэ барилгын хажуугаар үнгэрбэд. Базар гэнтэ эсэгынгээ гарһаа таталдажа:
- Аба, харана гүт тэрэ үндэр томо кран? - гэбэ.
- Харанаб, - гэжэ эсэгэнь ябадал дундаа юрэ харюусаба ха.
Базар ехэ шухала юумэ хэлэхэ гэһэндэл, эсэгэдээ шагтагалдан байлгажа:
- Эмшэнэй шүдэ аргалдаг, шүдэ нүхэлдэг машина энээндэл адли, - гэжэ барилгын томо краниие зааба.
- Зүб хэлэнэш, хүбүүмни. Нээрээшье адлирхуу түхэлтэй байна, - гэжэ эсэгэнь хүбүүнэйнгээ һанамжа дэмжэбэшье, гэр тээшээ яаралтай гэшхэлбэ. Эсэгэһээ хэдэн алхам гээгдэһэн Базар нюһаяа татаад:
- Аба, аба-аа! Магад, энэ кранаар великануудай шүдэ аргалдаг байжа болоо. Мантагар томо великанууд бархирдаг ха гү? - гэжэ яараһан эсэгынгээ хойноһоо ооглон, бишыхан Базар һанагдаагүй асуудал һураа һэн.

Үшѳѳ түрѳѳдүй байгаат

Гурбатайхан Туяана басаган эжытэеэ газаагуур ябаһанаа, гартаа хоёр адли ном баринхай, гэртээ оробо.
Үбэлэй шэмэрүүхэн жабарта шэмхүүлжэ, басаганайнгаа улаахан болоһон булхагархан хасарнуудыень эсэгэнь дулаасуулһаар, дэгэлыень тайлаба. Бишыхан Туяана хүхюутэй, шууяатайгаар хубсаһаяа һэлгээд, эсэгэдээ шэнэ номуудаа харуулба ха.
Гоё зурагуудтай номуудыень эсэгэнь һайхашаан хаража:
- Юундэ хоёр адли ном абаабта? - гэжэ һонирхобо.
Туяана удаан бодожо байнгүй:
- Нэгэ номыень эжымни намда бэлэг абаа, нүгѳѳ номыень би Гэрэлмаа басаганай түрэһэн үдэртэ бэлэг үгэхэб, - гэбэ.
- Бэрхэш даа, басагамни. Бэе бэедээ ном бэлэг үгэхэ гээшэ һайн хэрэг. Теэд ямар Гэрэлмаа тухай хэлэнэбши? - гэжэ эсэгэнь Туяанынгаа дурдагша басагые һанажа ядан асууба ха.
- Гэрэлмаае мэдэхэгүй юм гүт? Хүдѳѳ нютагта эжы абатаяа байдаг. Зун манайда айлшалжа ерээ һэмнай.
- Үгы, би һананагүйлби.
- А-аа! Тиихэдээ та дэлхэй дээрэ үшѳѳ түрѳѳдүй байгаа ха юмта даа, - гэжэ бишыхан Туяана бүдүүзгэйгээр хэлээд, набтархан һандали дээрэ түбхинэн, шэнэ номойнгоо хуудаһануудые иража, зурагуудыень хаража, сүлѳѳгѳѳ таһаршаба.

Баярай баяр

Баярай тоомоо таһархада, эхэ эсэгэ хоёрынь ходо углууда байлгажа хэһээдэг заншалтай һэн.
Нэгэтэ Баяр малшан нагасындаа зуһаха баатай болобо. Ерэ ерэһээр айлшан Баяр нагасынгаа һэеы гэртэнь сэхэ гүйдэлѳѳрѳѳ ороод:
- Харыт, нагасымнай гэр углуугүйл! - гэжэ ехэтэ баярлаа һэн.

You have no rights to post comments