1
Холын хараа бодолтой эсэгэ обогтон –
Хори, эхирэд, хонгоодор, сонгоол угсаатан –
Буряад-монгол гэжэ алдаршаһан золтойдоо
Байгал далайн эрье шадар түбхинэн,
Орос гүрэнэй омогхон үльмыдэ түшэжэ,
Оршолонто энэ юртэмсын үймөөтэ зоболон амсажа,
Нэгэ зариманиинь баян зөөри эдлэжэ,
Нүгөө олониинь үгытэй барлагшье боложо,
Элинсэг хулинсагайнгаа уг удамые алдангүй,
Эрдэни мэтэ аглагхан дэлхэйгээ энхэржэ,
Һолир мэтэ хурсахан зоригоо мүхөөнгүй,
Һонор ухаан сэдьхэлтэй амидаржа һуудаг һэн.
2
Орон дайдынгаа эзэд – Буурал баабайнарые,
Горхон, мүрэн, нуурнуудай Лусууд хааниие,
Одото жаргалай һүлдэ – Гал заяашаниие
Онгон бөөгэй ашаар тахин мүргэдэгшье һаань,
Баруун-Жуу, Богдын хүреэнһээ үршөөлтэй
Буддын шажан эгүүридэ мүнхэ дэлгэржэ,
Баталгата дасангууд нютаг бүхэндэ үндэлжэ,
Буянаа үйлэдэжэ, хурал, далга бүтээжэ,
Энэдхэг, Түбэд оронуудта түгэс мандаһан
Эрдэм ухаанай табан зүйлдэ шүтэжэ,
Үльгэр сударнуудай оюун гэгээниие оложо,
Үзэл бодолоо гүйсэд нарижуулан урмашадаг һэн.
3
Бата сагаан хаанай эрид тушаалаар
Байгалай үмэнэ ород зоной ерэхэдэ,
Алтан, мүнгэн медаль зүүнхэй тайшаанар,
Алас ерээдүй руу харасаяа шэглүүлһэндэл,
Агын, Хориин, Сэлэнгын болон Баргажанай
Талын дүүмэнүүдтэ олон жэлдэ зонхилходоо,
Хуушан монголоор угай бэшэг моторложо,
Хуби заяагаа хүгжэлтын замаар батажуулаад,
Сагаан эдеэ дэлгэһэн Сагаалганаа угтажа,
Сагаан хадагаар аха захатанаа золгожо,
Сахюур сагаан сэдьхэлһээ үреэлээ хэлэжэ,
Сагай һайханиие магтан дуулажа жаргадаг һэн.
4
Эрын зориг – мүнгэн хутага, хэтэ,
Эхэнэрэй энжэ заһал – зүүдхэл гоёолто, –
Мүнгэшэ дархашуулай наринаар урлаһан бүтээлнүүд
Мүнхэ үеын мартагдашагүй эдлэл боложо,
«Түрэ – түмбэгэр, ёһо – ёмбогор» гэлсэдэг, –
Түрэ хуримай найрта бэһэлигэй дуунууд,
Буурал үбгэдэй үльгэр домогшуу үреэлнүүд
Булаг мэтээр үе дамжан дэлбэрээд,
Эхэ нютагаа дээрэ үргэн дэлгэрүүлжэ,
Эжы, абынгаа буянгаар үри хүүгэдынь үдэжэ,
Талын уудамда шэнээр буусаяа түхеэржэ,
Табан хушуун малаа үдхэн арьбажуулдаг һэн.
5
Морин эрдэни! – гэжэ дэмы хэлэгдээгүй, –
Мориёо хазаарлан, элдин дайдаараа гүйлгэжэ,
Ажал үйлэеэ жэншэдгүй һайнаар бэелүүлжэ,
Амар амгалан жаргалаа эдлэн ябахадаа,
Зулгы дулаан зунай арюухан сагта
Зуһалан талын сэнгэлигтэ баран сугларжа,
Эрын гурбан нааданай ёһо баримталжа,
Эрхим дорюун найр, зугаа дэлгэхэдээ,
Буха ехэ хүсэтэйшүүлэй шалааень гаргажа,
Булсуутай годлиин хёрхо мэргэниие туршажа,
Урилдаанда илаһан мориной соло дуудажа,
Урмашан сэнгэжэ, архи дарһа амталдаг һэн.
6
Буряад-монгол арад үсөөншье һаа – ухаатай,
Буса түрэлтэн гэжэ нэршээшье һаа – хүндэтэй, –
Халуун зүрхэтэй һүбэлгэн хүбүүдээ сэгнэжэ,
Казань, Санкт-Петербург хото руу эльгээжэ,
(Хэтэ мүнхын баяр, омогорхол татаһан
Хэдэн габьяата нэрэнүүдые эндэ дурдахамни),
Европын эрдэмэй кандидат – Доржо Банзаров
Ерээдүйн доктор болохо һэн гэжэ нэмээд,
Ородой Хизаар ороноо шэнжэлгын хүреэндэ
Түбэдэй Һасые нээһэн Гомбожаб Цыбиковые,
Арбан гурба дугаар Далай ламын багша –
Ашата Гүшэг хамбадаа шүтэн бэшэрдэг һэн.
7
Сэхэнь хэрэгтэй,ниитын замаар дабшаһан
Цыбен Жамцарано, Базар Барадин эрдэмтэд
Алта мүнгэндэл сэнтэйхэн аман зохёолоор
Арад түмэнөө гэгээрүүлээ гээд баталхадаа,
Будда, Христосой илгаагүй – һүзэгэй убдистай,
Буряад, ород гэлтэгүй – үмсэдөө ажалтай,
Аажамхан сэдьхэлээр хүршэ хүбөө амидаржа,
Аралжаа наймаа хэжэ, хоорондоо харилсажа,
Ой модоёо түймэр табижа шатаангүй,
Олон гэгшын нугаһа, галуу хюдангүй,
Аршаан мэтэ уһа голнуудаа шэргээнгүй,
Ан амитадаа аршалан хамгаалжа омогорходог һэн!..
