Минии дүү басаган Ирина намһаа дүрбэ наһа дүү. Тэрэ мүнѳѳ гурбатай боложо ябана. Хожомдожо хэлэндэ ороһон Ирина ехэл жэгтэй, олон юумэндэ ѳѳрѳѳ нэрэнүүдые үгэнхэй.
Нэгэтэ саадһаа ерээд:
- Нетатка үгэ, - гэхэдэнь, яашье ойлгожо ядабаб.
Энэшье, тэрэшье юумэ абаад харуулнаб. Үгы даа, энэ бэшэ гээд лэ шортоо. Ядахадаа, тэрэмни ѳѳрѳѳ гүйжэ ошоод, стол дээрэ хэбтэһэн тетрадь абажа ерэбэ. Тиигээд:
- Кульку, кульку, - гэхэдэнь, баһал юушье ойлгоногүйб.
Тэрэмни шардайса гүйжэ ошоод, минии сүүмхэ асаржа үгэбэ.
- Эндэһээ юун хэрэгтэйб? - гэхэдэмни:
- Кулька, - гэбэ.
Тэрэнииень юуншье гэжэ ойлгожо ядаад, сүүмхэеэ нээгээд үгэбэб. Тэрэмни ручкыемни абаад:
- Зурахамни, зай, - гээд эрибэ.
Ирина нэгэ түхэреэхэн юумэ зураад орхибо. Тэрэнь нюдэн лэ хэбэртэй, хоёр точко табижархиба. «Хамар», - гэжэ хэлээд, доошонь зуражархиба. «Аман», -гээд, зурагар зурлаа хүндэлэн хэбэ. Тиигээд шэхэ хэхэдэнь, тэрэ түхэреэхэн юумэниинь хүнэй толгойл болохо хэбэртэй.
- Энэшни юун болохоб? - гэжэ асуубаб.
- Ляля, - гэжэ харюусаба.
- Бэень алин гээшэб?
Ирина нэгэ тэбхэр юумэ зураад, тэрээндээ гарнуудыень, хүлнүүдыень зураад: «Тапочка», - гээд, хоёр түхэреэхэн юумэ хүлэйнь доро зуражархиба.
- Ямар гоё ляля болоо гээшэб! - гэжэ минии магтахада, Ирина баярлаба, хүхибэ.
- Гансал шэхэниинь ямар дэрэгэр юм, - гэхэдэмни, муугаар хэлэбэ гэжэ һанаад, уруу дуруу болон:
- Боли, - гэбэ.
Зураг зуража сүлѳѳгүй һуухадамнай, эжы ажалһаа ерэбэ. Эжыгээ харахадаа, Ирина баярлашоод:
- Ошоё, эдеэлэе, - гэжэ, гарһаамни татаба.
Ирина колбаса харажархёод:
- Кабаса, кабаса, - гэжэ баярлана.
Эжы колбаса отолжо, маанадта шараад үгэбэ.
- Шараһан колбаса эдихэгүйб, - гээд, Ирина бархиршаба.
- Шарангүйгѳѳр эдидэггүй юм, - гэжэ эжы хэлээшье һаа, Иринэеэ түргэн һамааруулхын тула колбаса отолоод, шарангүйгѳѳр үгэбэ.
- Энэтнай иигээд лэ эриһэнээ абадаг хүн болохо даа, - гэбэ нагаса эжы.
- Ухаа ороходоо болино ааб даа, - гэбэ эжы.
- Хүсэд лэ ухаа орошоод, мүнѳѳнһѳѳ зонхилжо байна ха юм. «Хүн болохо - багаһаа, хүлэг болохо - унаганһаа» гэжэ мүнѳѳнһѳѳ һургаагүй һаа бүтэхэгүй.
Эжы зүбшѳѳжэ, тол-гойгоо дохибо. Булта сайлаад, Ирина бидэ хоёр ном харанабди.
Ирина ургажа байһан модо харажархёод:
- Дум, дум, - гэбэ.
- Энэшни модон гээшэ. Юундэ дум гэнэбши, - гэбэб.
Теэд тэрэ дум гээд һалаха юм бэшэ. Ирина шубуухайе заагаад:
- Эмжи, - гэбэ.
- Юрэдѳѳ, энэмнай бүхы юумэндэ ѳѳрһѳѳ нэрэ үгэдэг хайшаа хүн боложо байнаб, - гэжэ нагаса эжы гайхаба.
- Тиигэжэ байг лэ даа, дүрбэтэй-табатай болоходоо, зү-бѳѳр хэлэдэг болоно ааб даа, - гэбэ эжы.

You have no rights to post comments