Гадна энэ ушараар мандал бүтээгдэбэ. 1930-аад онуудта һандаргаагдаһан буряадай бүхы дасангууд 25 жэлэй туршада һэргээгдээ, шэнээр бодхоогдоо бшуу. Бүхы хамба ламанарай тоонто нютагта субарганууд олоной оролдолгоор баригдаа. Тиихэдэ Буддын шажанай «Даши Чойнхорлин» ехэ һургуули байгуулагдаад, Будаадын һургаал дэлгэрүүлнэ.

Эрын гурбан наада болон заншалта мал ажахы һэргээхэ хэрэгтэ хамба лама Дамба Аюшеев өөрынгөө ехэ хубита оруулаа гэхэдэ, арад зон арсахагүй байха.

XXIV хамба лама Дамба Аюшеев Шэтын можын Улаан Сүхын аймагай Шаргалжан нютагта 1962 оной сентябриин 1-дэ түрэһэн намтартай. 1980 ондо Петровск-Забайкальскын багшанарай училищи дүүргээд, Агын Буряадай тойрогой Хүнхэрэй дунда һургуулида багшалһан юм.

Удаань Агын дасанай зууршалгаар, 1983 ондо Монголдо Улаан-Баатарай Занабазарай нэрэмжэтэ Буддын шажанай университедтэ орожо, 1988 ондо түгэсхэжэ, түбэд эмшэнэй мэргэжэлтэй болоо. Тиигээд жэлэй туршада ЦДУБ-ай даабаряар университедтэ һурадаг совет оюутадай куратор ябаа. Һүүлээрнь Ивалгын дасанда эмшэ ламаар алба хаагаа. 1991 ондо Хяагтын аймагай Мүрөөшэ нютагай «Балдан Брэйбун» гэһэн Буряад ороной түрүүшын дасанай шэрээтээр томилогдоһон. Хоёр жэлэй туршада тэндэхи һандарһан дасанай һуурида Согшон дуган шэнээр баригдаһан байна.
1995 оной апрелиин 28-да Дамба Аюшеев XXIV дугаар бандида хамба ламаар һунгагдажа, Россиин Буддын шажантанай түб хүтэлбэриин түрүүлэгшэ болоо. Һүүлдэ тэрэ түб Россиин Буддын шажанай заншалта Сангха – Россиин Федерациин буддын шажанай нэгэдэлнүүдэй нэгэн гэжэ нэрлэгдэһэн юм. Дамба Аюшеевэй энэ тушаалда байхада, Улаан-Үдын Дээдэ Онгостойдо хамба ламын хоёрдохи ордон үргөө болгогдожо, дасан бодхоогдоо. Буддын шажанай 2 институт (Ивалгын, Агын) нээгдээ. Тэндэ буряад, монгол болон түбэд багшанар хүдэлдэг. Буряад ороной дэбисхэр дээрэ шэнэ дасангууд болон дугангууд нээгдэһэн. Буддын шажан Россиин заншалта 4 шажанай нэгэн гэжэ тоологдодог болоо, уласхоорондын холбоо барисаа бэхижүүлэгдэжэ захалаа. Хамба лама 1995 оной августын 2-һоо Россиин Федерациин Президентын дэргэдэхи Шажанай нэгэдэлнүүдэй зүблэлэй гэшүүн юм. 1998 оной декабриин 23-һаа Россиин Шажанууд хоорондын зүблэлэй президиумдэ, харин 2004 оной мартын 3-һаа СНГ-гэй гүрэнүүдэй Шажанууд хоорондын зүблэлэй президиумдэ ородог. Азиин гүрэнүүдэй Буддын шажанай эб найрамдалай конференциин вице-президент юм.
2011 оной июниин 4-дэ Монгол гүрэнэй Президентын зарлигаар, россиин-монголой харилсаа бэхижүүлгэдэ ехэ хубита оруулһанайнгаа түлөө «Полярная звезда» орденоор шагнагдаһан. 2011 оной июниин 17-до Кемеровскэ можын «За веру и добро» медальда хүртэһэн байна.

You have no rights to post comments