Энэ магазин ороходо, эдеэ хоолой зүйлнүүд элбэг, жэшээнь, холын гүрэнэй 5 янзын абрикос, виноград, яблока, авокадо, ананас, киви г.м. наймаагай таг дээрэ табяатай. Эдеэ хоол Россиин олон орон нютагуудһаа, Европын, Турциин болон дүтын хари гүрэнүүдһээ асарагдадаг. «Ѳөһэдөө теплицэ соогоо укроп, петрушка, кинза ургуулжа наймаалдагбди. Наймаада хадамуудайм, Сахюурта нютагай Намдак Жамсаранжаповай, зүгын бал бии. Өөрынгөө огородой морхооб, свёкло, хапууста худалдаа һаа гэжэ һанагдадаг. Тиихэдэ сэншье дэлгүүрэйхиһээ нэгэ бага доошоо байха аргатай. Бидэ нютагайнгаа зоной үйлэдбэриин эдеэ хоол худалдахые оролдодог, хэнтэйшье хүдэлхэ бэлэн байдагбди», - гэжэ Мунко Бороев хөөрэнэ.
Уншагшадаа Мунко Баторовичай намтартай танилсуулая. Тэрэ Ага тосхондо 1985 ондо түрэһэн, Агын 1-дэхи дунда һургуули дүүргээд, Агын багшанарай колледжын физическэ культурын факультет 2005 ондо түгэсхөө һэн. Удаань юристын мэргэжэл шудалаа. Арбан жэлэй туршада физкультурын багшаар Амидхаашын болон Агын 1-дэхи дунда һургуулинуудта, удаань Агын багшанарай колледждо хүдэлөө. Харин 2015 ондо хуби заяагаа эрид хубилгажа, үмсын хэрэг эрхилхэ гэжэ шиидээд, «Апельсинка» наймаа нээгээ һэн. Бэрхэшээлнүүд байбашье, бултыень дабажа, мүнөө Мунко Баторович урагшатай, урматай дорюун хүдэлнэ. Үмсын хэрэг эрхилэгшэ хоёр хүниие ажалаар хангана.
Мунко Баторович Ага тосхондо үнгэргэгдэһэн элдэб олон мүрысөөнүүдтэ, конкурснуудта тэдхэмжэ үзүүлдэг. Жэл бүри үмсын хэрэг эрхилэгшэд депутадуудтай хамта Шэнэ жэлдэ эрэмдэг хүүгэдтэ бэлэгүүдые барюулдаг байна. Тиигэжэ, жэшээнь, нёдондо 90 хүүгэд бэлэгтэ хүртэһэн юм. Мунко Баторовичай шунал гэхэдэ, туризм болоно. Тэрэ тойрогойнгоо һонирхолтой, суутай газарнуудаар – Алхана уула, Хээтэй агы нүхэн г.м. ябаха дуратай.
Наталья Андреевна нүхэрынь Агын тойрогой больницада хүүгэдэй врачаар хүдэлдэг. Залуу гэр бүлэ хоёр басагадые хүмүүжүүлнэ. Энэ бүлэ гэртээ ород, буряад хэлэнүүд дээрэ адли тэгшэ хөөрэлдэдэг, хүүгэдтээ түрэлхи хэлыень, ёһо заншалаа мэдүүлхые оролдодог.
Мунко Бороев ажаһуугшадые нютагайнгаа ямаршье холисогүй, сэбэр хоолоор, холыншье гүрэнүүдэй шанартай фрукт, алим жэмэсээр хангажал, ажалынь бүри урагшатай байхань лабтай.
