Ким Харганаев мүнөө Буряад ороной урдаа хараха шоумен болонхой. Хуулита ёһоор тушаалынь «Креативный продюсер медиа группы «ARCHI FILMS» гэжэ нэрэтэй юм. Хажуугаарнь «Бурятия онлайн» инстаграмм паблигай резидентээр хүдэлдэг.

Ким Хүһөөшэ нютагта 1988 ондо түрэһэн. Хара багаһаа хүнһөөл һаа ондоохон хүбүүн байһан ха. Энэдхэгэй киногой хүгжэм доро хатарха, дуу дуулаха, нүхэдтөө зааха, гурбан кубай түмэр боошхо руу Витас дуушанай «Опера №2» дуу дуулаха гэхэ мэтые хэдэг байгаа. Ябан ошон бэлигтэй хүбүүн нютагайнгаа болон тойрогой бүхы хэмжээ ябуулгануудта - КВН-шье байг, тамирай мүрысөөншье байг - хабаадажа эхилээ. Тиихэдээ һанаандаа дуратай юумэеэ хэнэб гэжэ ябаа.

Һургуулияа түгэсхөөд, Ким Улаан-Үдэ ошожо, экономистын мэргэжэл шудалхаяа дээдэ һургуулида ороо. Хоёр жэл соо экономико минии наһанай хэрэг бэшэ гэжэ тобшолол гаргажа, Б.Ринчиногой Агын багшанарай колледж руу хүгжэмэй багшын мэргэжэлдэ һурахаяа ерээ. Эндэ олон танил нүхэдтэй боложо, зохёохы талмайгаа олоһон юм. Хажуудань Чимит Санжимитупов, Саян Цымпилов болон бусад оюутад байба.

– Агын багшанарай колледждо би олон юумэ өөртөө абааб. Хажуудам минии наһанай, ахашье зохёохы эрмэлзэлтэй хүнүүд олон байгаа. Минии тон хүндэтэй багша Светлана Дагбаевна Базарова үдэр бүри шахуу хэлэжэ, «тусгаар хүнби, шадаха хүнби» гэжэ этигэл намда түрүүлһэн хүн юм. Тиимэ зоной намай дэмжэжэ байхадань, соёлдо наһаяа зорюулхам гэжэ бодол ерээ һэн, - гэжэ Ким хөөрэнэ.

Колледждо һураһанай һүүлээр Ким Улаан-Үдэ ошожо, П.И.Чайковскиин нэрэмжэтэ колледждо ороһон. Тэндэ баһал зохёохы эрмэлзэлтэй зонтой харилсажа ябаа. Өөрынь хэлэһээр, «багшанарай иигэжэ дэмжэжэ, үргэжэ байхада, ажал олохо гээшэ бэлэн байгаа».

Саашадаа Ким Андреевич эдэбхитэй ажаһуудалаа үргэлжэлүүлээ. Буряад ороной филармонидо артистаар, үмсын хэрэг эрхилэгшээршье хүдэлһэн байна. Хододоо Андрей Алексеевич абынгаа хэлэһэн «ехээр шашангүй, юумэеэ хэжэл яба, тиихэдэш бүхы юумэншни урагшатай байха» гэһэн үгэнүүдые һанажа, урагшаа дабшан ябаһан.

- Минии аба - наһаараа хара ажал хэжэ ябаһан хүн. Тиигээшье һаа, нэгэшье дахин гэншэжэ, гонгиножо ябаагүй. Элдэб эбдэрхэй техникэ заһажа шадаха, нарин хүн һэн. Намайе өөрынгөө жэшээгээр болон шанга зоригоор хүмүүжүүлһэн», - гэжэ шоумен хөөрэнэ.

Мүнөө Ким Харганаев интернедэй хүн болоһон юм. Ородоор хэлэбэл, «Медийное лицо». «Түхэриг» гэһэн Интернедэй уудамда бэелүүлэгдэһэн түлэблэлынь бүхы буряадуудта мэдээжэ.

- Минии һанахада, би амжалтатай хүнби. Тэрээнһээ болохо, би жаргалтай хүн гээшэб. Сэдьхэлдээ таарама ажалтайб, дуратай гэр бүлэтэйб. Дүтымни зон булта энхэ элүүр. Бэшэ юун хэрэгтэйб? Алдар соло гээшэ ажалаа шанартайгаар хэхэдэ гү, али баатаршалга гаргахада ерэдэг юумэн гэхэ.

Харин наһанай, тааруу хэрэг олохын тула ехэхэнээр оролдохо хэрэгтэй. Өөрынгөө түлэблэнүүдые бүтээжэ байхада, һайн түсэб һанаха гээшэ нэгэ, тэрэнээ бэелүүлхын түлөө ехэхэн ажал хэгдэдэг юм. Һанаһандаа хүрэтэрөө ябаха хэрэгтэй, - гэжэ Ким уншагшадтамнай хандаба.

Саашадаа Ким Харганаев урдаа олон бэелүүлхэ түсэбүүдые табинхай байна. Тэдэнэйнь дүнгүүдые маанад телефоной сэнхир экранаар хараха бэзэбди.

You have no rights to post comments