Руслан Батожаргалов «Yндэр тэнгэриин одод» гэhэн хубсаhанай суглуулбари мүнөө жэл бүтээжэ, Бүгэдэ буряадай «Алтаргана» фестивальда хабаадахадаа, тусхай шанда хүртөө бэлэй. Мүн Ага нютагайхид октябрь hарада «Амар сайн» театрай хаhын нээлгын концертнааданда энэ хубсаhанайнь суглуулбаритай дүтөөр танилсаха аргатай байгаа.
Р. Батожаргалов хубсаһанайнгаа суглуулбари харуулна.
Дээрэhээ үгтэhэн талан бэлигтэй оёдолшон Руслан Владимирович нюдэнэй шэмэг болохо тааруу, зохидхон гоёлой хубсаhа бүтээжэ, хизаарай, тойрогой конкурснуудта лауреадай, дипломантын нэрэ зэргэнүүдтэ оло дахин хүртэhэн. Тиихэдээ Ага нютагаа үндэр хэмжээндэ, урагшатай, һайн түлөөлжэ, оёһон хубсаһаниинь олондо һайшаагдадаг. Тэрэ бага наhанhаа Согто-Хангил нютагай, буряад дэгэл оёдог Дэжэд Цыгмитова хүгшэн эжынгээ хажууда хамhалсажа, урлал оёдолдо дуратай болоhон. Анха түрүүн Лена дүү басагандаа һургуули түгэсхэгшэдэй баалда үмдэхэ үдэшын плати оёжо, гэртэхиндээ магтуулаад, ехэ урмашаһан ха. Тэндэл «уран оёдол гээшэ минии эдлэхэ ажал хэрэгни» гэжэ ойлгохо болоо һэн. Нютагтаа Руслан Батожаргалов 10 гаран жэлэй туршада хүн зонһоо захил абажа, элдэб янзын хубсаhа оёжо, дүршэл дүрыень олоһон. Ага нютагай уран оёдолшон Цыденжаб Цыбиковада хандажа, ямар аргаар буряад хубсаһа тааруу зохидоор, гоёор оёхо, эсхэхэ, хумихаб гэхэ мэтэ асуудалнуудые һуража, туһатай зүбшэл заабаринуудыень хадуун абадаг. «Буряад дэгэл, хубсаһа бүтээхэ гээшэ ехэ оролдолгын хүсэн. Оёдолой талаар зүбшэл һуража, олон хүн намда хандадаг. Руслан юумэ хадуухадаа, түргэн, бэрхэ, уран бэлигтэй хүн юм. Оёдолой ажалда ехэ хананхатай байдаг, дэгэл хубсаһа нарин нягтаар бүтээжэ, буряадай хээ, янза түхэл оруулхые оролдодог. Тиимэһээ уран бүтээл, хубсаһануудынь үзэмжэтэй, зохидхон байдаг. Тимур Цыренжаповай генерал зиндаатай болоходонь, нютагайхидынь Руслан Батожаргаловай оёһон буряад дэгэл, малгай бэлэглэжэ, үндэһэн хубсаһанай гоё һайханиинь элеэр харагдажа байгаа һэн», - гэжэ Цыденжаб эгэшэ онсо тэмдэглэһэн байна.
Дэлгэрэнгыгээр 46-дахи дугаарта.
