1895 ондо ородой эрдэмтэ физик А.С.Попов дэлхэй дээрэ түрүүшын радиоприёмник бии болгоод, тэрэнь түргэн сагай туршада хаа- хаанагүй дэлгэрэн таража, үргэнѳѳр хэрэглэгдэжэ эхилhэн түүхэтэй. 1915 ондо Забайкалиин ниислэл Шэтэ хотодо, 1929 ондо Буряад-Монгол Республикын түб хото Дээдэ-Yдэдэ түрүүшын радиостанцинууд хүдэлжэ эхилhэн.
«ШҮДХЭРЭЙ ХАЙРСАГ»
Ямаршье хүнэй багтахын аргагүй бишыхан аад, хүнэй хоолойгоор абяалhан хайрсагууд бии боложо, тэрэ үеын улад зониие ехээр сошоон hүрдѳѳhэн, хэмгүй ехээр гайхуулhан түүхэтэй. «Yндэр модон столбнуудай оройгоор хүнэй абяанууд hүрэжэ гүйлдэдэг болобо. Тиигээд гэрэй ханада үлгѳѳтэй хайрсагууд руу орожо байрлаад, тэндэhээ абяа гаргана, шууяна, бѳѳлэлдэнэ. Ёhото альбан шүдхэрэй зэмсэг! Тэрээниие шагнахань ехэ нүгэлтэй», - гэhэн үгэ хүүрнүүд тала дайдаар таража, хүн зониие хүлгөөбэ.
Түрүүшын совет радионуудай нэгэн.
1929 ондо Буряад-Монголой ниислэл хотын ажаhуугшад түрүүшынхеэ «Москвагай абяа дуу» шагнажа эхилээд, 1931 онhоо ород ба буряад хэлэнүүд дээрэ Дээдэ-Yдынгѳѳ hонинуудые шагнажа эхилhэн түүхэтэй.
Хүнүүд «шүдхэрэй хайрсагта» аалихан дадажа, хажуудань дүтэлхэдѳѳ, шэхэеэ бүглэхэеэ болёод, түрүүшээр hэмээхэн, бэе бэеhээ нюусаар, саашадаа улам бүри hонирхон шагнадаг болобо. Уданшьегүй «дуугардаг хайрсаг» улад зоной байдалда бүхэ hуури эзэлээд, эршэмтэйгээр хүгжэжэ эхилhэн. Республикын политикын, ажахын, соёлой г.м. - бүхы hалбаринууд тухай үргэнѳѳр хѳѳрэхын хажуугаар залуу совет республикын коммунистическэ номнолой ба агитациин ёhото рупорынь болоhон. Тэрэ үедэ улад зониие гэгээрүүлгын, хүмүүжүүлгын ба hонин тараалгын хэрэгтэ радиотой сасуулма бэшэ хэрэгсэл байгаагүй гэжэ эли.
Дэлгэрэнгыгээр 19-дэхи дугаарта.
