«Россиин Федерациин габьяата артист», «Буряадай арадай артист» гэһэн нэрэ зэргэнүүдтэй Болот Бороев мүнѳѳ мэндэ ябаа һаа, 70 наһаяа гүйсэхэ байгаал даа.
Бага наһанhаа артист мэргэжэлтэй болотороо, Болот Володя гэжэ нэрэтэй ябаһан юм. Би Хара-Шэбэрэй 8 жэлэй hургуулида 7-8-дахи ангинуудта Владимир Бороевтой сугтаа нэгэ класста һураа бэлэйб. Һүүлээрнь бидэ Шэтын хүдөө ажахын техникумдэ (ЧТМЭСХ) орожо, хүдөө ажахын мэргэжэлтэн болохын тула 2,5 жэлэй туршада суг хамта һураабди. Тиихэдээ би 54-дэхи, харин Володя 57-дохи бүлэгэй оюутад hэмди. Тэндэ 2-дохи курсда hуража байхадаа, хоюулан нэгэ айлда байгаад, хэшээлнүүдтээ ябадаг байгаабди.
Гурбадахи курсда hуража байтараа, Володя техникумhээ гаргагдажа, hуралсалаа үргэлжэлүүлхэ аргагүй болоо hэн. Энээндэ Володя балайшье гажараагүй бшуу. Тиигээд анда нүхэрни Хара-Шэбэр ерэжэ, түрэл hургуулиингаа пеэшэ түлигшөөр дулаасуулгын хаhын дүүрэтэр хүдэлөө. Энэмнай 1966 оной январь-февраль hарануудта болоhон хэрэг. Уданшьегүй сэрэгэй бодото албанда ябаха сагынь боложо, тэрэнээ Улаан-Үдэ хотын хажуудахи Дивизионная станци шадар үнгэргөө һэн. Эндэhээ, сэрэгэй частьhаа зууршалалгатай боложо, Львов хотын сэрэгэй политическэ училищи (ЛВВПУ) ороhон байна. Эндэ удааншье hурангүй, Буряадай түб хото ерэжэ, Банзаровай нэрэмжэтэ багшанарай институдта hуралсалай жэлэй тэнлээдшье байгаа hаань (1969 оной февраль hара), ямаршье шалгалтагүйгөөр орожо шадаhан юм. Эндэшье удаан hурангүй, 1970 ондо Мурманск хото ошожо, загаhашадай томо онгосо дээрэhээ загаhа барилгын онол арга шудалжа, баhа нэгэ ажабайдалай ехэ дүршэл олохо хубитай байгаа. Эндэhээ энэл можын Мончегорск хото ерэжэ, ДОСААФ эмхидэ ажалда абтаа. Баhа хэдыдэнь бэ даа эндэhээ холо бэшэ байhан Апатиты гэжэ руднигта ойр зуура хүдэлжэ үрдеэ. Мончегорскдо байхадаа, тэгшэ бэшэ газарта мотоциклаар урилдаанай мүрысөөндэ (мотокросс) хабаадажа үзөөб гэжэ хожомынь хөөрөө hэн.
Хаанашье ябахадаа, хаа-яашье hаань, намда бэшэг бэшэжэл, hонин hорьмойгоо дуулгажал байгаа. Загаhашадай бригадада хүдэлжэ ябахадаа, Исланди ошоһоноо, hүниин Рейкьявик хото hайхашааhанаа намда бэшээ агша hэн. Тиигэжэ байтараа, гэнтэ ойлгон гэхэдэмни, Бороевhоо бэшэгшье ерэхэеэ болёод, хаанашье ябаhаниинь мэдэгдэхэеэ болишоод байгаа. Володя нүхэрни мүнөө хаана гээшэб гэжэ гэртэхинhээнь hонирхоходомни, Улаан-Үдын Чайковскиин нэрэмжэтэ хүгжэмэй училищиин оюутан болоо гэжэ хэлээ агша һэн.
Хэдэн жэл үнгэрhэн хойно Сагаан Уулаяа ерэхэдээ, «Бишни артист боложо, консерватори ошожо hураха болоод байнаб», - гээ бэлэй.
Консерваторишье түргэн болзор соо дүүргэжэ, удаан болонгүй нэрэтэй солотой, мэдээжэ артист – дуушан болоhыень бүхы Ага нютагай, Буряад оронойшье зон мэдэнэ ха юм даа. Үнинэйл артист болохо ёhотой хүн байгаал даа. Хаанашье ябахадаа, ямаршье ажалда хүдэлжэ байхадаа, дуушадай элдэб янзын конкурснуудта лауреат болоhон лэ ябадаг байгаа ха юм. Жэшээнь, 1977 ондо Мончегорскдо хүдэлжэ байхадаа, «Ищем таланты на Кольской земле» гэhэн конкурсын лауреат болоо. Хэдэн жэл урда тээнь телевизионно конкурсдо илаhан байна.
Тиигээд Болот Бороев гээшэмнай hургуулида, техникумдэ hуража ябахадаа, ямар хүбүүн ябаа hэн бэ гэhэн асуудал гарахал ёhоороо гарана.
Дэлгэрэнгыгээр 40-дэхи дугаарта.
