Шара нохой жэлэй морилжо бууха саг ойртобо. Сагаан һарын гарахын урда тээ Забайкалиин хизаараар дид хамба лама Цырен Дондукбаевтай уулзажа, нохой жэл хүнэй ажабайдалда, амитадта, байгаалида ямар нүлөөтэй байхаб гэжэ һурабабди.

«Нохой гээшэмнай хүнэй дүтын нүхэр, муу хүниие хусаха, һайн хүндэ һүүлээ шарбагануулан дүтэлхэ», - гээд, Цырен ламхай зурхайнгаа ном нээжэ хараба.

 

Байгаалиин уларилай талаар хэлэхэдэ, зарим газар дайдаар ехэ хура бороотой байха, зарим тээ үүлэгүй, хуурай байха бшуу. Бороогой ехээр ороһон газараар гол горход эрьеһээ халижа, үерлэжэшье болоходоо магадгүй. Таряанай, ногоо-ной ургаса дунда зэргэ. Зунай эхин һара шииг нойтотой байхаар багсаагдана. Ой соо жэмэс ургамал элбэгээр ургаха. Хабартаа шангаар һалхилха, зунай дунда һара бүгшэм халуун, намартаа хүйтэн байхаар хүлеэгдэнэ. Ханяадан, хамшаг үбшэнгүүдтэ зон ехээр нэрбэгдэжэ болохо. Нялха нарай үхибүүдтэ ба үндэр наһатай зондо хатуушаг жэл болохо, харин дунда наһатайшуулда бараг байха бшуу. Засаг бариһан хүтэлбэрилэгшэдтэ, ноёдто албанай талаар һайн. Малда баһал һайн жэл байха. Эбэртэ бодо мал үсхэбэрилдэг зоной зөөри нэмэхэ, харин бага бодо малда (хони ямаадта) шэрүүншэг байхаар хүлеэгдэнэ. Үнеэд һүтэй байха. Адуун һүрэг, тэмээ барихада, арьбантай ба хэшэгтэй байна. Бүхыдөө арад түмэндэ номгон, алишье талаар урагшатай жэл байха.  

You have no rights to post comments