- Дарима Балдановна, танай дамжуулгануудые хүдөөгэйхид хэр зэргэ харана гээшэб?
- Буряад орондо 23 хүдөө аймаг бии. Улаан-Үдэ хото шадархи 3 аймагай ажаһуугшад Буряадай телевидениин дамжуулгануудые үнинэй харадаг ааб даа. Анхан цифровой телевидениин хүсэндөө ороодүй байхада, Буряад Республикын дэбисхэрэй 90 хуби айл бүхэн гэхээр сэнхир дэлгэсэ харадаг байгаа. Мүнөө цифровой аргын нэбтэрүүлэгдэхэдэ, бүхы нютагуудта дамжуулга харадаг болоод байна.
   - Теле-дамжуулга харадаггүй зон бии гү?
   - Эдэ хэд бэ гэхэдэ, хуушан телевизортэй, хүндэ байдалда ороhон зарим хүнүүд телевизортэ залгаха приставка абаагүй байдаг. Тэрэ түхеэрэлтэ залгахада, хүн зон олон канал харадаг, дамжуулгын дүрсэ зурагай шанаршье һайжардаг.
   - Ямар үдэрнүүдтэ буряад дамжуулганууд ябуулагданаб?
   - Манай республикада Бу-ряадай телевидениин дамжуулганууд үдэр бүхэндэ гаража байдаг. Гансал «Россия-1» федеральна каналаар амаралтын үдэр үглөөнэй сагта гарадаггүй. Буряад Уласта юун боложо байнаб, дээдын засаг зургаанда ямар тогтоолнууд абтанаб гэхэ мэтые харуулха ёһотойбди. Иимэ дамжуулганууд бимбын үдэр 40 минутын туршада ород хэлэн дээрэ, 5 үдэрэй хугасаа соо үглөөнэй 9 сагһаа Буряад ороной һонинуудые 23 минутын туршада буряад хэлэн дээрэ харуулнабди. Тэрээнһээ сааша рекламна соносхолой удаа 10 саг болотор элдэб сэдэбээр дамжуулганууд 27 минута 30 секундын туршада гарадаг. Дабаа гарагта (понедельник) мэдээсэлэй удаа «Сагай сууряан» дамжуулга соо 7 хоногой туршада болоһон шухала үйлэ хэрэгүүд тухай хөөрэжэ үгэдэгбди. Тиихэдээ 10-аад минутын туршада хөөрэлдөө хэхээр, юумэ мэдэхэ айлшан уригдажа, энэ дамжуул-га вторнигто «нара» харана.
   - Yшөө ямар юумэ харуулдагбта?
- «Сагай сууряан» гэhэн программа хүтэлбэрилдэг Бальжинима Дамбаев улас түрын ажаябуулгын, экономикын, соёлой ба тамирай, шажанайшье талаар шэнжэлхы удхатай дамжуулгануудые бэлдэдэг, экспертнүүдэй һанамжа бодолнуудые оруулдаг. Гарагай гурбанда «Үлгүүр» гэһэн эвенк программа 7 хоногой нэгэ удаа эвенк болон ород хэлэн дээрэ 15 минутын туршада гарадаг. Тэрэнэй удаа хэнтэйшьеб уулзалга хэжэ, буряад хэлэн дээрэ һонирхолтой хөөрэлдөө хэдэгбди. Буряад Уласай Эрдэм һуралсалай яамантай нягта холбоотойгоор хүдэлжэ, средагай үдэр «Багшын булан» гэhэн дамжуулгада эрдэм болбосоролой ямар хэмжээ ябуулганууд, шэнэ онол арганууд бии болооб гэжэ хөөрэжэ үгэдэгбди.
- Таниие тусхай дамжуулгануудые хэдэг гэжэ дуулаа һэнби.
- Мүнөө жэл майн 31-дэ минии хүтэлбэрилдэг «Буряад орон» гэһэн дамжуулгын бии болоһоор 30 жэл болоо. Согто-Хангил нютагhаа гарбалтай, сагаан һанаатай, баян хэлэтэй Баир Цыренжапович Дамбаринчиновтэй суг хамта энэ дамжуулга бэлдэжэ ажаллаһан байнабди. Шүлэг, прозо бэшэхэ бэлигтэй һэн. Һүүлэй үедэ электронно һужаа соо буряад дамжуулгануудаа табижа, буряад хэлэнэй хүгжэлтэдэ ехэ нүлөө үзүүлһэн. 2015 оной ноябрь һарада нютаг хүбүүнэй наhа барахадань, шаналхаар байгаа. Мүнөө энэ дамжуулга 27-30 минутын туршада гарадаг. Тиихэдээ нэгэш дабтагдадаггүй, 7 хоног бүри шэнэ юумэ харуулха гэжэ оролдодогбди. Пятницын үдэр «Толи» гэжэ дамжуулга ябуулагдадаг. Тэрэ түрүүн сэхэ шууд (прямой эфир) гарадаг байгаа. Мүнөө үглөөгүүр дамжуулагдадаг болоходоо, буулгажа бэлдээд гү, али Монгол оронhоо, баруун тээхи гүрэнүүдhээ, үгышье hаа дүтэ шадар оршодог регионуудhаа айлшаар бууhан хүнүүдые урижа харуулдагбди.

You have no rights to post comments