Бурханай орон - Алхана уулын үбэртэ Алханын Ехэ шанда хүртэхын түлөө буряад барилдаагаар 13-дахи мүрысөөн августын 5-да үнгэргэгдөө.
Барилдаанай нээлгэ. Суута барилдаашан Ц.Максаров мүрысѳѳнэй гал баряад ябана.
Барилдаанай ногоон талмай дээрэ бүдүүн зонһоо гадуур ургажа ябаһан эдир шамбайшуул барилдажа, харагшадай нюдэ баясуулаа. Тамирай нааданда ганса Үбэр Байгалай хизаарһаа барилдаашад ерээ бэшэ, мүн Буряад ороной Захааминай, Хэжэнгын, Ивалгын аймагуудһаа, Улаан-Үдэ хотоһоо бүхэшүүл ерэжэ, мүрысөө шэмэглээ бшуу. Хамта дээрээ 170 тамиршад бэеын гурбан шэгнүүртэ хубааржа хабаадаа. Тооробшо малгай, арһан сабхи, шуудаг үмдэһэн, бүһэ бэһэлһэн бүхэшүүл барилдаанда уригдахадаа, бүргэдэй хатар хатаржа, халуун альга ташалгада хүртөө һэн. Эмхидхэлэй хороон энэ жэлэй мүрысөөе урда жэлнүүдһээ үшөө нэгэ шата дээгүүр үнгэргэжэ шадаа.
Юһэ дахин Алханын Ехэ шанда хүртэһэн, суута абарга бүхэ Цыбик Максаров энэ удаашье амжалта туйлажа, илагдашагүй бүхэ байһанаа дахяад гэршэлээ. Тэрэ гол уулзалгада мэдээжэ бүхэ Зориг Жамбаловые диилэһэн байна.
Дэлгэрэнгыгээр 32-дохи дугаарта.
