С.Дашинимаев.

 

Декабрь һарада Агада эдир хүбүүдэй хоорондо үнгэргэгдэһэн Россиин хэмжээнэй мүрысөөндэ Забайкалиин хизаар түлөөлһэн Догойн эдир барилдаашан Солбон Дашинимаев илалта туйлаһан байна. Тэрэ финалда 76 кг шэгнүүртэ барилдахадаа, Саха-Яхадһаа гарбалтай Ренат Чердоновто баллаар шүүгдэжэ ябаһан аад, нюрган дээрэнь шэдэжэ шүүжэрхеэ һэн.

Забайкалиин хизаарай физическэ культурын ба тамирай габьяата хүдэлмэрилэгшэ, дүрэ буляалдаата барилдаагаар СССР-эй тамирай мастер Дугаржаб Жаргаловай хүмүүжэмэл Солбон Дашинимаев тус мүрысөөндэ илалтаараа нютагаа суурхуулан, тойрогой тамирай түүхэдэ нэрэеэ оруулаа бшуу. Залуу барилдаашан тойрогой эдир тамиршадта бодото дээрээ жэшээ, мүн нютагайхидай найдал болоо.

Абарга бүхэ Нордоб ба Номин Дашинимаевтанай гэр бүлэдэ 2001 ондо түрэһэн. Аба эжынь Догойн ажахын түрүү хонишод юм. Дээрээ хоёр ахатай, дороо дахуулха дүү басагатай. Солбон 6-7-дохи ангиин һурагша ябахадаа, барилдаагаар һонирхожо, Могойтын тамирай һургуули- интернадта орожо, саашаа улам бэрхэ барилдаашан болоо бэлэй.

Һоригшо Дугаржаб Жапович иигэжэ хэлэнэ: «Солбон багаһаа бэрхэ, оролдосотой юм. Хүмүүжэмэлэйнгээ илалтаар ехэ омогорхоноб». Үнгэржэ байһан жэлдэ Солбон Дашинимаев Хэжэнгэдэ үнгэргэгдэһэн Советскэ Союзай Герой Дарма Жанаевай дурасхаалай, Хитадта болоһон уласхоорондын мүрысөөнүүдтэ 2-дохи һууринуудые эзэлээ.

 

Дэлгэрэнгыгээр 51-дэхи дугаарта

You have no rights to post comments