Елена Онер 11-дэхи жэлээ Могойто тосхоной хүүгэдэй уран урлалай байшанда хүдэлнэ. Тойрогой үзэсхэлэнэй «Из камня, глины и рога» янзада 3-дахи шатын дипломоор шагнагдаа һэн. Өөрөө 3 жэлэй туршада ябуулагдаха программа зохёожо, «Рисование», «Лепка» гэһэн кружогуудта гурбан бүлэгтэ 40 гаран хүүгэдтэй хүдэлдэг. Түрүүшын жэл хүүгэд «Рисование» бүлэгтэ ябадаг. «Лепка» бүлэгтэ жэлэй туршада урид пластилинээр, удаань дабһатай талхаар, һүүлдэнь шабараар хүдэлдэг байна. Тиигээд дүршэлтэй болоходоо, элдэб уран бүтээлнүүдые хэжэ эхилдэг юм. Гурбадахи жэлдээ үхибүүд элдэб түлэблэлнүүдтэ, конкурснуудта хабаададаг. Хаанаһаа, ямар шабар хэрэглэгдэнэб гэхэдэ: «Могойто тосхонһоо холо бэшэ, Үрөөнэйн харгыда анхан сагһаа шабар абадаг. Тэрэ шабар һайн шанартай, тэндэһээ асаржа хэрэглэдэгбди. Эмхимнай Үбэр Байгалай хизаарай эрхэтэнэй форумой хэмжээндэ «Доброе творчество» гэһэн социальна түлэблэлдэ хабаадажа, 60 мянган түхэригэй грантда хүртөө һэн. Тэрэ мүнгөөр шабар шатаадаг тусхай пеэшэн абаа һэмди. Тиигэжэ һайн пеэшэнтэй болоходоо, томошье бүтээлнүүдые хэхэ аргатай болообди. Саашадаа шабарай үйлэдбэриин круг абаха түсэбтэйбди», - гэжэ Елена Чымбаевна хөөрэбэ.
Лена басаган Чымба ба Вера Онертоной 7 хүүгэдэй ехэнь юм. Тэрэ абынгаа талаан бэлиг, шадабари бэедээ шэнгээжэ, эдлэжэ шадаа гэхэдэ болоно. Аяар холын Тува нютагһаа Вера нүхэрэйнгөө тоонтодо нютагжаһан Чымба Самданович Догойн соёлой байшанда уран зураашаар, һургуулида нэмэлтэ һуралсалай багшаар хүдэлһэн юм. Һайхан, түбшэн зантай багша олон лэ үхибүүдые уран һайханай юртэмсын оньһонтой танилсуулһан байха. Вера эжынь баһал оёхо, нэхэхэ шадабаритай юм. Лена Догойн дунда һургуули дүүргэһэнэй удаа 1998 ондо Агын багшанарай училищи зурагай ба черчениин багша мэргэжэлээр түгэсхөө һэн. Агын Буряадай тойрогой мэдээжэ уран зурааша, багша Доржи Гомбоевто заалгаха аза талаантай байһандаа баяртайб гэжэ Елена Чымбаевна мэдүүлнэ. Багшын түрүүшын шабинарай нэгэн болоно бшуу. Удаань һуралсалаа Үбэр Байгалай гүрэнэй университедтэ үргэлжэлүүлжэ, психолог мэргэжэлтэй болоо һэн. Могойтын хүүгэдэй уран урлалай байшанда 2009 онһоо хүдэлнэ.
Дүршэлтэй багша шэнэ технологи шудалхын ба һуралсалай шанар дээшэлүүлхын түлөө мэргэжэл шадабариин конкурснуудта хабаададаг, эмхиин, аймагай, тойрогой хэмжээндэ дүй дүршэлөө согсолжо, мастер-классуудые үнгэргэдэг юм. Һуралсалай эмхинүүдэй хоорондо элдэб сэдэбүүдээр зурагай, плакадуудай болон уран бүтээлнүүдэй конкурснуудые аймагай хэмжээндэ эмхидхэдэг байна. Елена Чымбаевнагай амжалтанууд ехэ, нэгэ хэдыень дурдабал, «Учитель года» янзада Могойто тосхоной захиргаанай толгойлогшын шанда хүртэһэн, уран урлалай 41-дэхи уласхоорондын конкурсын «Профи» болон «Забайкальский сувенир» гэһэн хизаарай конкурсын «Сувенирная декоративная кукла» янзануудта лауреат болоһон, аймагай технологиин багшанарай хоорондо «Декоративно-прикладное творчество» шэглэлээр коуч-седтэ, 1-дэхи шатын дипломдо хүртөө бэлэй. Аймагай һуралсалай һалбариин хүгжэлтэдэ ехэ хубитаяа оруулһанай түлөө Могойтын аймагай захиргаа-най Хүндэлэлэй грамотаар шагнагдаһан. Бүхэроссиин «Новогоднее творчество» конкурсын 1-дэхи шатын лауреат юм. Нэмэлтэ һуралсалай 100 жэлдэ зорюулагдаһан Агын Буряадай тойрогой конкурсдо 3-дахи һуури эзэлээ бэлэй.

Эдэ олон жэлэй туршада Елена Онер олон хүмүүжэмэлнүүдые һургаа. Өөрын гараар бүтээл хэжэ, түлэблэл зохёожо һураһан хүүгэдэй шадабари хүгжэлтэдэнь туһатай байхань лаб. Шабинарынь региональна, бүхэроссиин болон уласхоорондын хэмжээнэй илагшад юм. Жэл бүри Елена Онерой шабинар «Детство без границ» гэһэн конкурсдо амжалтатай хабаададаг. Тус конкурсын региональна шатада илажа, уласхоорондын хэмжээндэ гарадаг юм. Жэшээнь, амжалта туйлагша түрүүшын һурагшадынь гэхэдэ, Сэлмэг Жамбалова «Детство без границ» уласхоорондын конкурсын «Художественное изобразительное творчество» янзада 1-дэхи һуури эзэлээ һэн, һүүлдэнь «К 65-летию космонавтики» янзаар түлэлбэл зохёожо, космическа литэ бүтээһэнэй түлөө гурбан басагад – Аяна Мижитдоржина, Оюна Митупова болон Аюна Мункоболотова гэгшэд түрүү һуурида гараа бэлэй. Мүнөө жэл баһал февраль һарада ажалнуудаа энэ конкурсдо эльгээгээ, харин коронавирус үбшэнһөө боложо, дүнгүүдынь үшөө эли болоодүй. Елена Онерой хөөрэһөөр, зураха гү, али шабартай хүдэлхэ дуратай хүүгэд олон. Хоюуландань улигтайшье хүүгэд баһал үсөөн бэшэ. «Талаан бэлигтэй, урлалда абьяас-тай хүмүүжэмэлнүүдһээ би өөрөөшье юу хээндэ һурадагби», - гэжэ багша хөөрэнэ. Багша Елена Чымбаевна Алдар хүбүү хүмүүжүүлдэг, тэрэ футбол, баскетбол г.м. тамирай янзануудаар бэеэ һорихо дуратай юм.

Мүнөө сагта нэмэлтэ һуралсалда ехэ анхарал хандуулагдадаг болонхой. Дүршэлтэй, ажалдаа дуратай багша Елена Чымбаевна хүүгэдтэеэ суг ургажа, үндэр амжалтануудые туйлажа ябанал даа.

You have no rights to post comments