Бүхэдэлхэйн залуушуулай үдэр 1945 оной ноябриин 10-һаа тэмдэглэгдэжэ эхилһэн юм. Бүмбэрсэг дэлхэйн залуу үетэниие нэгэдүүлжэ, нацизмын үйлэ ябадалнуудые усадхаха зорилготойгоор энэ һайндэр байгуулагдаһан түүхэтэй.
Энэ үдэрѳѳр дашарамдуулан, аглаг һайхан Ага нютаг руу хари гүрэнһѳѳ ерээд байһан залуушуултай уулзажа, эндэхи хүбүүд, басагадтай хэр һайн харилсаатайб, нютагһаа холо байхадань, ямар бэ гэжэ һонирхон, хѳѳрэлдѳѳ эмхидхэһэн байнабди. Редакциимнай айлшад – Агын эмнэлгын колледжын оюутад, Монгол ороной залуу гэр бүлэ Һамадоржын Лувсандоржо ба Амгалан-Баатарай Оюун-Зула.
- Лувсандоржо, гэр бүлын эзэн хадаа нэн түрүүн ѳѳр тухайгаа хѳѳрэгты, нүхэртэеэ танилсуулагты…
- Би 1987 ондо Монгол ороной Баян-Дун һомондо Һама-доржо ба Сэдэл-Һама хоёрой гэр бүлэдэ арбан үхибүүдэй одхон хүбүүниинь боложо түрэһэн байнаб. Нютагтаа дунда һургуули түгэсхѳѳд, Дорнод аймагай техникумдэ ювелирэй мэргэжэл хоёр жэлэй туршада шудалаа һэнби. Удаань нютагаа бусажа, жэлэй туршада мэргэжэлээрээ хүдэлѳѳб. Теэд һомон дээрэмнай минии мэргэжэл ехэ олзогүй байхадань, нютагайнгаа эмнэлгын газарта пеэшэ түлигшѳѳр (кочегар) ороо бэлэйб. Теэд дулаанай үедэ хэхэ ажалай үгы болоходо, даргамни санитараар уриһан байна. Гурбан жэлэй туршада эмнэлгын газарта хүдэлѳѳд байтарни, Чойбалсан хотодо Росси гүрэнэй Ага нютагай эмнэлгын колледждо һураха хүсэлтэй оюутадые шэлэжэ байна гэжэ соносхогдоо. Тиихэдэнь ажалаймни ахамад врач медбрадай мэргэжэл шудалха хүсэлтэй һаашни, туршая гээ. Тиигэжэ Оюун-Зула нүхэртэеэ хэлсээд, Ага хоюулаа ошожо һураха дуратай байхадамнай, зүбшѳѳһэн байна. Мүнѳѳ хоёр жэлэй туршада Ага нютагта эмнэлгын сестрагай ба медбрадай мэргэжэл дуратайгаар шудалжа байһан хоёрбди.
Дэлгэрэнгыгээр 46-дахи дугаарта.
