Туһа
Доржын хилээмэ абахаяа наймаа ошожо ябахада, хүл муутай Балжид хүгшэн хорёогойнгоо үүдэ нээгээд:
- Доржо-аа, намда хоёр монсогор хилээмэ абалсаад ерыш даа, - гээд, мүнгөө һарбайба.
Доржо наймааһаа гэртээ гурбан хилээмэ ба Балжид хүгшэндэ хоёрые абаад ерэбэ. Хүл муутай абгайн гэр соогуураа һалиржа ябатарынь, Доржо хоёр хилээмыень стол дээрэнь табиба. Хүгшэнэй ехэ баярлан, хүбүүе хүндэлхэ гэхэдэнь, тэрэнь үгы байжа байба. Ямар бэрхэхэн, хүнгэн, солбон хүбүүн гээшэб даа гэжэ һанажа байтарынь, үүдэн нээгдээд, хоёр хүнэг уһа бариһан Доржо орошобо.
- Оо! Ямар бэрхэ хүбүүн гээшэбши! Уһагүй болоод байна гэжэ өөрөө хараад, хүнэй хэлээгүй байхада, уһатай болгожорхихо. Бэрхэш даа, би ехэ баярлабаб. Басаганайнгаа городһоо ерэхэдэ, шам тухай хөөрэхэб даа, - гэбэ Балжид хүгшэн.
- Бараг ааб даа, хэрэгтэй болоо һаам, намда хонходооройгты, - гээд, Доржо телефонойнгоо дугаар Балжид хүгшэндэ бэшэжэ үгөө.
Алдуу заһалга
Футбол хадаа хүбүүдтэ тон һонирхолтой наадан. Хабарай дулаахан үдэшэ хотоной хүүгэд футбол наадахаа сугларбабди. Хоёр можо боложо хубаараад, хоёр бартаа табибабди. Түрүүшын можо «Одон», хоёрдохинь «Мүшэхэн» гэжэ нэрэтэй болобо. «Одон» можын капитан Доржо, «Мүшэхэнэйхи» Согто болобо. Одоошье наадамнай эхилбэ даа. Тон түрүүн Бадма «Одоной» бартаа руу гол сохижо оруулжархёо. Доржынхид нэгэ бүмбэгэ алдаһандаа ехэ халаглаад, улам һайнаар наадажа эхилбэ. Тиигэжэ байтараа, өөһэдөө гол оруулба. Нэгэ-нэгэ болгоод хүхилдэжэ, Дондог шангаар бүмбэгэ үдьхэлэн гэхэдээ, Долгор абгайн сарайн сонхо тэһэлжэрхибэ. Сонхын шэл олиггүй шанга абяатайгаар бута һүрэн, газарта унашаба. Байһан хүүгэд булта шахуу тэрьедэшэбэ.
- Байгыт! Хайшаа гүйлдэбэт!? Долгор абгайда орожо, сонхынтнай шэл бидэ ойлгомторгүй тэһэлээбди гэжэ хэлэел, хүн муу юумэ хэбэл, заабол тэрэнээ мэдэрхэ ёһотой, алдуу эндүүгэйнгээ түлөө хүлисэл гуйха хэрэгтэй, - гэбэ Доржомнай.
Хүбүүд бусабад. Дондог зүрхөө алдан, Долгор абгайнда орохо болобо.
