Арсалан хаанһаа захалаад,

Ангуудшье олоороо сугларба.

Алтан Гургалдайн дуулахада,

Абаһаар булта магтаба.

Баглаа хоншуу сэсэгээр

Баярые хүргэн амаршалба.

Заа-зуу зурадаг Тэмээн

Забһарлалай үедэ гансаараа

Зугаа үгэнэгүй бэшэ нүхэдтөө,

Зураашанби гээд өөрыгөө һаахаран:

- Ямар юумэ хэһэндэнь энээниие

Яатараа магтанаб - гайхалтай!

Жажалаад үгэһэн хойно

Залгингүй яахаб Гургалдай?!

Хараад үзэе, түрүүшээр

Хэн дуушанда туһалнаб.

Үгынь бэшэнэ поэдүүд,

Хүгжэмынь зохёоно композиторнууд,

Хуур, лимбэ татаашад

Хажуугаарнь хэды олон бэ?

Эдэнэй үгы хада Гургалдай

Эгээлэй нэгэн ябахал һэн.

Харин би гансаараа

Хэды хүдэлнэ зобонобиб?

Хэн нэгэнэй намда

Хажууһаамни дүнгөө һаань,

Холуур мэдээжэ болохо һэм

Хангюурдагша Гургалдайһааш дутуугүй.

Бүргэд хажууһаань шагнаархаад,

Бадашан хэлэбэ

Тэмээндэ:

- Дуулаад үгыш мүнөө эндэ

Дууша Гургалдайн орондо!

Шамайе бариһан хүн үгыл,

Шанда хүртэхэ ааламши.

Тэмээн гансата гунхын,

Тархияа ганзагалан үлэбэ,

Танил бэшэ нүхэдынь

Ташаганаса энеэлдээд тараба.

Иимэ Тэмээн зурааша

Ирагуу дуу яагаад ойлгохоб?

Уран бэлиггүй аад,

Уран зураашанби гэхэнь дэмы.

Харин нүгөөдэнь –

Гургалдайл хадаа

Гургалдай.

You have no rights to post comments