- Депутадта кандидадаар
Дэбжээ намай мэдэхээр,
Дэмы хооhоор шашанагүйб,
Дууhан хэрэгыетнай бүтээхэб.
Шара үнэгэн hамгатайб,
Шадал соогоо болохоб.
Дуугаа үгэгты намда,
Дурадхал оруулнаб танда.
Үтэлhэн ангуудта гэрнүүдые
Үтэр түргэн барюулхаб.
Үлбэр үгытэйшүүлдэ мүнгэ
Үглөөдэртөө нэмүүлхэб.
Аймагыетнай дээшэнь үргэжэ,
Автобус, машинаар хангахаб, - гэжэ
Үбсүүгээ тоншон, Шандаган
Үлүүсэ hайрхаба, үгэеэ үгэбэ.
Дурагүйшье hаа, ангууд
Дуугаа баран үгэбэд.
Депутат болобо Шандаган,
Дээдын зургаанда hуулсаба.
Ан арьяатанайнгаа захилые
Абаhаар түргэн мартаба.
Гэр байра өөртөө,
Гүйлгэдэг хурдан машина
Түргэн абажа үрдибэ.
Түрэлхидтөө нилээн хамhалсаба.
Депутадайнгаа нэрээр
Дээгүүр hанаатай болобо.
«Хэндэ хэрэгтэй депутат бэ», - гэжэ,
Тайгын ангууд хэлсэбэ.
Нэрэ зүүhэн депутат,
Нээрээшье, хэндэ хэрэгтэйб даа.
Автор: Элбэг МАНЗАРОВ.
