Заха хизааргүй нэмжыһэн Монголой талаһаа мүхэшэгүй зоригтой баатарнууд, гүн ухаатай ламанар, эрдэмтэд, мэдээжэ олон хүн гараһан юм. Тэдэнэй дунда бүхы арадтаа мэдээжэ уран зохёолшо, поэт Ринчингийн Чойномой нэрэ бата бэхи һууритай.
1990 гаран онуудта Зүдхэли нютагай Даширабдан Гурорабдановай гарта Монголой уран зохёолшо Ринчингийн Чойномой шүлэгүүд ороһон байна. Тэрэ гэһэнһээ хойшо Даширабдан Гурорабданов Р.Чойномой поэзидэ дурлажа, Монгол ошоһон зондо Р.Чойномой зохёолнуудые захижа асаруулаад, тэдэнииень уншажа, зүрхэ сэдьхэлээ ханаадаг... Р.Чойномой зохёолнуудта Даширабдан Гурорабдановай дуран мүнѳѳшье болотор буураагүй, юундэб гэхэдэ тэрэнэй зохёолнууд зүрхэ сэдьхэл хүдэлгэмэ гүнзэгы удхатай байдаг, 10 гаран шүлэгыень Д.Гурорабданов буряад хэлэн дээрэ оршуулһан юм. Гурбан жэлэй нэгэ удаа Монгол орондо Р.Чойномой дурасхаалда «Оюухай» гэһэн шүлэгэй фестиваль эмхидхэгдэдэг байна. Тэрэ фестивальда «Ѳд» гэһэн жаса ехэ ажал ябуулдаг, эмхидхэгшэнь Д.Гандболд юм. Тэрэ Д.Гурорабданов (зүүн талаһаа), Л.Дымбрыл Р.Чойномой зохёолнуудта Д.Гурорабдановай үнэн зүрхэнһѳѳ дурлаһыень зонһоо дуулажа, шүлэгэй фестивальда уряа. Тиигэжэ эндэ һая Монголдо 10-дахяа эмхидхэгдэжэ байһан «Оюухай» фестивальда Даширабдан Гурорабданов Пильжидма нүхэртэеэ хабаадажа ерээ.
Мүнѳѳ жэл Монгол орондо Р.Чойномой түрэһѳѳр 80 жэлэй ойн баяр тэмдэглэгдэнэ. Энэ ехэ дэмбэрэлтэ ойн баяртань монгол туургатан даган баясана. Байгша оной февралиин 10-һаа эхилжэ, ерэхэ жэлэй февралиин 10 болотор «Чойномой юртэмсэ» гэһэн уряа доро Монголой бүхы хото городуудай, сэлеэнгүүдэй һургуулинуудаар, сэсэрлигүүдээр Р.Чойномдо зорюулагдаһан хэмжээ ябуулганууд болон уран зохёолшодтой уулзалганууд үнгэрнэ. Энээнэй гол зорилго хадаа уран зохёолшын нэрэ болон бүтээлнүүдыень арадай дунда бата бэхеэр мүнхэлэлгэ болоно. Мүн тиихэдэ олон радио-дамжуулгануудта Р.Чойномой зохёолнууд гүйсэдхэгдэнэ. Иимэ ехэ хэмжээ ябуулгануу- дай хажуугаар тоонтодонь - Хэнтэйн аймагай Дархан сүмын Шара Нохойто нютагта Р.Чойномой дурасхаалда митинг ба концерт эмхидхэгдээ. 1993 онһоо «Оюухай» гэһэн шүлэгэй фестиваль Дархан сүмэдэ эмхидхэгдэжэ эхилһэн, тэрэ фестивальда Монголой бүхы шүлэг найруулагшад, поэзидэ дуратай зон сугларжа, уран бэлигээрээ хоорондоо мүрысэдэг болоһон. Мүнѳѳ шүлэгшэдэй мүрысѳѳн хоёр үдэрэй туршада үнгэрѳѳ. Гурорабдановтанай бүлэ Р.Чойномой хүшѳѳдэ мүргѳѳ, тэрээндэ зорюулагдаһан баримтата кинонуудые хараа. 1995 ондо Р.Чойномой дурасхаалда үүдэеэ сэлиһэн музей орожо, зураһан зурагуудыень, наһан соогоо абаад ябаһан бэшэлгын машинкыень, гитарыень хаража, сэдьхэлээ ханаа, удаань уран зохёолшын «Минии шүтѳѳн» гэһэн найруулан бэшэһэн поэмыень буряадаар уншаад, «Хүндэтэ айлшан» гэһэн медальда хүртѳѳ. «Даширабдан ахын һайгаар энэ фестиваль онсолон ондоогоор үнгэрбэ, энэ ахамнай хэмжээ ябуулгын шэмэглэл болобо», - гээд фестиваль хүтэлэгшэд тэмдэглээ. Ушарынь гэхэдэ, Росси гүрэнһѳѳ түрүүшынхеэ хабаадаһан зон эдэ хоёр байгаа юм. Фестивалиин шүлэг найруулагшадай конкурсдо дүн хамта, багсаахада, 60-аад хүн хабаадаа. Түрүүшын шанда хүртэһэн О.Цэнд-Аюш «Оюухай-2016» гэһэн заахан болор дүрсэдэ болон 2 сая түгригэй сертификадта хүртѳѳ. «Ѳд» жасын хүтэлбэрилэгшэ Д.Гандболд ээлжээтэ «Оюухай» гэһэн фестивальда буряад уран шүлэгшэдэй хабаадахадань болохо гэжэ Даширабдан Гурорабдановта мэдүүлээ юм. «Буряад-монгол туургатан хоорондоо харилсаатай байха ёһотой, иимэ хэмжээ ябуулгануудта бэе бэедээ ябалсажа байгаа һаа, ехэ зохид һэн», - гээд Д.Гурорабданов тэмдэглэнэ.
Дэлгэрэнгыгээр 42-дэхи дугаарта.
