«В списках не значился» романhаа хэhэгэй оршуулга
Брестын хэрэмэй һүүлшын хамгаалагшада зорюулагдаһан хүшѳѳ.
… Подвалай үүдэндэ айхабтар туранхай, хэдытэйб гэжэ хэлэхын аргагүй хүн зогсобо. Тэрэ толгой нюсэгэн, сайһан ута үһэниинь мүрэнүүдтэнь хүрэнэ. Бүhѳѳр татагдаһан хүбэн хүүртигтэнь хирпиисын тооһон шэнгэшэһэн, нюсэгэн, хабдашаһан, үни хатаһан шуһатай үбдэгүүдынь үмдэнэйнь соорхойгоор харагдана. Һалаһан, дальба һүрэһэн сабхи сооһоонь олигой ехээр хабдаһан, хүлдэшэһэн хара хурганууд үзэгдэнэ. Тэрэ яб гэмээр, бэеэ сэхэлһэн, толгойгоо дээшэнь үргэһэн, һохор болоһон нюдѳѳрѳѳ таһалгаряагүй нара харана. Эдэ сабшалаагүй шэртэһэн нюдэдhѳѳнь баригдашагүй нулимсанууд мухарина.
Тойроод хон-жэн. Солдадууд болон офицернүүд дуугай байна, генерал абяагүй зогсоно. Тээ холошог ажал хэжэ байһан эхэнэрнүүд ажалаа орхёод, абяа шэмээгүй зогсонод, харуулшадшье дуугарнагүй. Мүнѳө энэ сэб сэхэ зогсоһон, хүшѳө шэнги хүдэлдэггүй хүниие булта харана. Тиигэһээр генерал аалиханаар юун бэ даа гэжэ хэлэбэ.
- Нэрэ зэргэеэ, обогоо хэлэгты, - гэжэ Свицкий оршуулба.
- Би - ород солдадби.
Хоолойнь бүдэхи, харюунь шангаар, үлүү шангаар дуулдаба: энэ хүн удаан абяагүй байгаа, тиимэhээ хоолойнгоо ааляар, шангаар гараһые ойлгоногүй. Свицкий харюуень оршуулба, тиихэдэнь генерал юун бэ даа гэжэ дахин һураба.
- Ноён генерал нэрэ зэргэеэ, обогоо хэлэхыетнай гуйна…
Свицкиин хоолой шэшэргэнээд, тэрэ һугшарһаар бархиршаба, шэшэрһэн гарнуудаараа хонхойшоһон хасарнуудаа нулимсаараа будажа, тогтохоо болёод бархирба.
Гэнтэ аалиханаар эрьелдэжэ, сабшалаагүй харасань генералые гэтэбэ. Наада барин энеэбхилһэн шэнгеэр үдхэн һахалынь татагад гэбэ:
- Юун бэ, генерал, ородой верста соо хэды алхам бэ гэжэ мүнөө мэдэхэ болобо гүт?
Энэ хадаа тэрэнэй hүүлшын үгэнүүд байгаа. Свицкий генералай ямар бэ даа үшөө асуудалнуудые оршуулна, харин танигдаагүй хүн үнѳөхил зандаа һохор болоһон нюдөөрөө нара шэртэһээр, дуугай зогсоно.
Санитарна авто-унаа ерэжэ, эмшэн ба тэлүүртэй хоёр санитарнууд яаралтайгаар гарабад. Генералай зүбшэн дохиходо, тэдэ танигдаагүй хүн руу гүйлдэшэбэ. Санитарнууд тэлүүрээ дэлгээбэ, эмшэн юун бэ даа гэжэ хэлэнэ, зүгөөр танигдаагүй хүн эмшэниие хажуу тээшэнь зайсуулаад, авто-унаа руу ошобо.
Тэрэ яб гэмэ алхасаар, сэб сэхээр, юумэ хараашьегүй hаа, хүдэлжэ байһан мотоорой абяагаар тон зүб шэглээд ошобо. Бүгэдэ зон байһан газартаа зогсоно, харин тэрэ гансаа-раа, хабдаһан, хүлдэһэн хүлнүүдээ хүндөөр табибашье, омогтой алхална.
Гэнтэ немец лейтенант хонгёогоор, жагсаалда байһандал, эршэмтэйгээр захиралта үгэжэрхибэ, тиихэдэнь солдадууд һүеыгѳѳ ниилүүлээд, буугаа нэгэ жэгдээр «харуулда» үргэбэ. Удаань немец генерал сэрэгэй ёhоор гараа фуражкадаа асарба.
Сэрэгэй дээдын хүндэ үгэжэ байһан дайсадай жагсаал соогуур солдат найган, аалиханаар ябана. Дайсадайнгаа хүндэлhыень тэрэ харанагүй, ойлгоошье һаа, тэрээндэ хамаагүй байгаа бэзэ. Брестын хэрэмэй hүүлшын хамгаалагша бүхы хүндын дээдэ тээнь, алдар суугай дээрэ, ами наһанай болон үхэлэй дээрэ байгаа һэн…
Дэлгэрэнгыгээр 25-дахи дугаарта.
