2019 ондо Дулдаргын аймагай соёлой байшанда «Культура +» гэһэн худалдаа наймаанай бэшэ автономно эмхи байгуулагдаа. Тиигэжэ Үбэр Байгалай засагай газарай «В нас сила земли Забайкальской» гэһэн конкурсын грант шүүһэн байнабди. «Культура +» эмхиин директор Д.Димчиков ба Дулдаргын соёлой байшанай директор Д.Дабаева гэгшэдэй ударидалга доро Табтаанай, Үзөөн, Балжана, Ара-Элеэ, Үлэнтэ, Элеэ, Алхана, Зүдхэли, Тугшан, Шандали нютагуудта арадуудай соёл, урлал, аман зохёол дэлгэрүүлхэ зорилготойгоор «Здравствуй, добрый друг, тала!» гэһэн концерт-наадан табигдаа, элдэб үзэсхэлэн, конкурснууд эмхидхэгдээ бшуу. Ахамад методист Н.Дашиева сценари бэшээ.
Манай хүгшэн аба эжынэр хүршэ һууһан ородуудтаяа хани барисаатай, ябалсаатай байһан. Үри хүүгэдынь энэ заншалаа алдаагүй. Урдань Сагаан hарада гү, али үнэн алдартанай шажанай hайндэрнүүдтэ - түхэреэн жэл соо нэгэ нэгэндээ айлшалжа, жэшээнь, ород нүхэрынь «добрый друг, тала» гэжэ буряад нүхэртөө хандаад, шэниисын талхаар болгоhон түхэреэн томо, амтатай хүбэриг, огородой эдеэ, үндэгэ, агнууриин хэрэгсэлнүүдые ба нэрэhэн архишье асардаг һэн. Буряадууд бэлэгэй харюу болгон, гараараа сохиhон тоhо, зөөхэй, ээзгэй, хониной, үхэрэй мяха үгэдэг һааб даа. Тиихэдэ арhа шүрбэhөөр оёhон даха, сээжэбшэ, бээлэй асаржа, хоорондоо андалдадаг, наймаашье хэдэг байhан.

Сагаан түмэр хулгана жэлэй март hарада нютаг бүхэнөөр ябахадаа, орон дэлхэйдэ, сахюусадта hү сайгаа үргөөд, хүхэ номин хадагаар арад зониие золгожо, үреэлэй hайханиие хэлээд, нэрьелгын дуугаар концерт-наадаяа эхилдэг байгаабди. И.Галимон ба Д.Дулмаева хоёр «Тоонто нютаг» гэжэ дуу аятай зохидоор гүйсэдхөө, А.Рабжинов эвенк арадай дуу дуулажа, шагнагшадые һонирхуулаа, Зүдхэлиин соёлшод А.Анчикдоржиева, С.Дашиева ба Шандалиин Б.Дамдинжапов гэгшэд буряад дуунуудые хангюурдаа, Красноярово hууринай староста, соёлшон Т.Гурулёва багша мэргэжэлтэй М.Соломенцева хоёр угсаатанайнгаа хубсаhа үмдэжэ, дуу дуулажа һайшаагдаа. Залуушуул таабари таалсажа, оньhон үгын, урга таталгын мүрысөөнүүдтэ хабаадаа бшуу. Уулзалга бүхэн ёохорой дүхэригөөр, хороводоор түгэсэдэг байгаа.

Эндэл ябахадаа, Зүдхэли нютагай мэдээжэ соёлшон Д.Жалсановагай оёhон элдэб гутал, хубсаhа хаража бахархаабди. Тэрэ соёлой байшанда «Морин эрдэни» гэһэн арадай бүлгэм хүтэлбэрилдэг, суг хүдэлдэг нүхэдтэеэ урлал, оёдол хэжэ, түрэл нютагаа суурхуулаа, Москва, Санкт-Петербург, Якутск, Улаан-Үдэ, Шэтэ хотонуудта уран бүтээлнүүдээ дэлгээжэ, магтаалда оло дахин хүртэһэн.

Үндэһэн соёлой марафондо 500 гаран хүн хабаадаа. Яhатан бүхэн соёл, урлал, бэлигээ харуулжа, бэе бэетэеэ дүтөөр танилсана.
Уншагшадта хандажа, арадуудай хани барисаа, соёл, заншал харуулһан толилолгонуудаа газетын нюурта бэшэжэ байгыт гэжэ уряалха байнаб.

You have no rights to post comments