«Алтаргана» нааданай хэмжээндэ илдамхан дангинанарай мүрысөөнэй олоной анхарал татадагынь мэдээжэ. Агын «Бүргэд» тамирай комплекс соо «Алтаргана» нааданай 2-дохи үдэртэ гоо басагадай мүрысөөн эмхидхэгдээ.
Монгол Уласай, Эрхүүгэй можын, Буряад ороной, Үбэр Байгалай хизаарай 13 дангинанар хаа-хаанаhаа ерэжэ, тус мүрысөөндэ хабаадаа. Басагадай уран шадабари, талаан бэлигыень обёоржо элирүүлхэ зорилготой жюриин гэшүүд удаахан сагай туршада зүбшэлсэжэ, дүнгүүдые гаргаа. Мүрысөөнэй эсэстэ жюриин гэшүүд тайзан дээрэ уригдажа, гоо басагадта хабаадагшын баталамжа барюулаа. Мүн тиихэдэ Буряад ороной Надежда Шагдурова, Эрхүүгэй можын Ольга Балдаева, Монгол Уласай Дорнод аймагай Галсан Жаргалан, Үбэр Байгалай хизаарай Янжима Дашидондокова дангинанарта лауреадай диплом, алтан медаль ба 85000 түхэригэй сертификадууд барюулагдаа. Монгол Уласай Дорнод аймагай Цэрэнтогтох Батдулам гран-пригай кубогаар, лауреадай дипломоор, алтан медаляар ба 100000 түхэригэй сертификадаар шагнагдажа, XIV «Алтаргана» нааданай илагша боложо, түүхын хуудаhанда оробо.
Валентина ЦЫРЕНЖАПОВА.
